孫柏文 (AM730 10.28.2009)

作為一個千禧年代入世港男，孫柏文想達到人生目標，比之前一代平實得多。因我對等單位，即港女，都知期望愈高、失望愈大，唔會點迫我要有乜乜物物先有來往。咁就唔使有車、有樓、有豐控股(005)。
我唔需要以上，咁要乜？其實淨係要每朝一起身，聽到一把甜美聲音、鼓勵說話就可以。
今日同大家分享我需要，係因為我為《am730》寫專欄之後，除有稿費之外，原來滿足到我以上提過最本能需要。

噚日早上電話響起，一聽就聽到係《am730》女同事來電，叫我不如今日講個市或者投資心得。因我戰場前線上，有多年同港女交流經驗，所以唔多唔少都吸收港女惡習，即就算正有此意，都要好有矜持。

其實我呢幾個月，每逢有人問我個股市點睇，我都係同一答案：「股神巴菲特有個師傅，叫Benjamin Graham。佢出過一套講點樣執行價值投資法書，如果你有呢套書，又呢個位問我，好唔好入市，不如下次去燒食時，呢套書出來，一頁一頁咁來『透爐』，燒佢算。」今次恒指由萬多點，升至呢個水位，完完全全係因為全球政府出手，特別係祖國同花旗國，瘋狂印鈔。如果你覺得聯儲局可以將街貨幣供應繼續發大、花旗政府年年都可借萬億元去使錢、內地銀行又一直會提供上十萬億元人民幣貸款，你咪繼續去買囉。聽講中國移動(941)落後喎，你仲唔身落去？

呢幾日有「fan屎」問我，依家究竟應該點？我問佢係咪想入市？佢話手上有貨，唔知點算。咁我就答話要清倉，佢就話「唔得」，因為仲係蟹貨。

我心一算就跟著問：「你咩位入？32,000點？」佢唔出聲。不過咁，32,000點入得，22,000點當然問可唔可以繼續升。佢繼續問我，唔係要我睇法，其實只係要我派心靈雞湯。

講完股市，不如講樓市。上個禮拜已經講過，好似民主黨李永達等抽水議員，又好似96年咁，高呼要為「無殼蝸牛」，要求「八萬五」復活。

我仲記得98年立法會選舉的論壇上，港島區立法會議員何秀蘭被問及，董特首有冇德政時，佢話有，就係「隊樓市」。

今次「八萬五」又再次死灰復燃，其實全賴恒基地產(012)在干德道的豪宅新盤「天匯」，賣七萬多蚊一呎。我好希望七萬多蚊一呎係堅，恒基係有真金白銀袋落袋。

如果係老吹，既冇益恒基，仲要換來「八萬五」復活，我只可話：「八萬五復活，多謝李兆基！」。
作者為前石油業證券分析員。視股市為終身學習的場所，不斷交學費。