孫柏文 (AM730, 6.9.2010)

孫柏文曾經聽過一個古仔，今日要同大家分享。有個經濟學家叫John Maynard Keynes，中文叫凱恩斯，如果你讀過香港教育署嘅會考程度經濟科課程，都應該知佢係邊個。

佢以前喺英國劍橋教書，有日佢授課時，就見有一個之前嗰晚去玩、劈酒嘅學生，因為酒氣未消、筋疲力竭，上課時瞓着咗。

凱恩斯見到佢咁，就即刻大發雷霆，走過去學生度大力拍枱，跟住要求個學生答佢啱啱問嘅問題。

學生即時彈起身，雖然嚇一跳，不過清醒起嚟就咁答：「凱Sir，我真係聽唔到你問乜。不過答案係政府應該加大開支！」今日要同大家分享嘅原因，係因為凱恩 斯真係吓吓得加大政府開支做解決經濟問題嘅答案。例如，問佢：「西班牙失業率達20%，點先可以降低？」佢唔會話叫西班牙檢討下，更唔會講如「老闆唔可以 炒人」，呢啲特區著紅色衫後生仔、露事業線後生女社運家最支持，不過最終搞到工人冇工開嘅低能政策。

凱恩斯只會答：「加大政府開支！」究竟呢條橋得唔得？呢個之後再講，不過吓吓加大政府開支嘅代價，就係政府財政赤字會愈來愈大，冇儲備就會有國債。最終債 台高築，爆煲等人救。而一救就會喪權辱國，因連使錢權利都會俾咗救你嘅「恩人」(國際貨幣基金組織、歐盟、北京，大家對號入座)，你個政府仲可以做啲乜？

被教育署教科書誤導嘅你會問：「政府加大開支變赤字，只要短暫，經濟一反彈，稅收上升，咪冇事囉？」咁我就只可以反問：「財赤對經濟咁好，咁全球政府加碼 使咗錢成兩年，點解經濟都係一池死水？」不過，凱恩斯如果喺九泉之下聽到我反問，一定經佢個問米佬克魯明(Paul Krugman)答：「咁要再加大政府開支！」今時今日嘅世界情況，除非你係個只望香港嘅典型特區社運家，否則凱恩斯學派嘅經濟理論已被證明係錯！錯都 算，仲要禍害人間。

所以，依家去到歐洲因政府財政失控，爆連環金融危機，最開心應該係我呢啲讀過中學程度經濟學嘅人。

因為平時啲人問你啲喺中學學過嘅嘢時，你記唔起就只有尷尷尬尬咁轉話題，不過今時今日問關於凱恩斯學派嘅經濟學時，大家就可以話：「俾番晒先生啦！乾淨 晒！」我亦奉勸學生哥們，如果你讀經濟(Econ)，就唔好再讀凱恩斯啲嘢。好似讀天文學仲讀緊話地球係平、又係喺宇宙中心嘅書。你可能話：「不過先生話 試卷會出喎！」我只可以答：「呢啲咁嘅A要唔要都罷。」因為個試仲考得凱恩斯啲嘢，個A遲早唔值錢！

作者為前石油業證券分析員，視股市為終身學習場所，不斷交學費。