孫柏文 (AM730, 6.7.2010)

上周，我哋特區單一最大納稅單位，香港賽馬會，宣布要罰練馬師梁定華。審訊小組決定，判處罰款七萬五千大元，算係罰得重。咁梁定華做過啲咩要罰得咁重？

首先大家要明白馬會練馬師嘅職責，就係幫啲馬主練好佢哋啲馬。由食啲乜、點操練、馬匹瞓覺時舒唔舒服，都係練馬師負責。咁當練馬師覺得隻馬準備好，可以參賽時，就會為佢哋報名。

報名後，就唔係練馬師話跑得就會跑得，都要最後獸醫把關，睇吓有冇啲健康問題，冇先跑得。要獸醫最後檢驗，原因有兩個，第一，當然係為隻馬本身，如果唔跑得都俾佢跑，就即係虐畜囉。第二，當然係保護投注人士嘅利益，一旦係因健康問題而隻馬輸咗，咁就好無辜。

其實人都係咁，好似我哋國寶劉翔，就算佢其實狀況大勇，又天賦神速，不過，一旦扭親隻腳都照跑，咁就唔好啦。

咁點解上周梁練會被罰？原來佢有訓練隻叫「三扒兩撥」嘅馬，咁就去報名出賽。點知獸醫話健康唔及格，唔准跑。情況就好似啲投資銀行咁，想出批投資產品，點知俾信貸評級公司一睇，就話唔達標。

咁如果揸正來做，梁定華就應該等到隻馬好番，先再報名。不過梁練冇咁做，佢將「三扒兩撥」俾另一個獸醫睇，仲要冇同第二個獸醫講話已經睇過以及唔及格。不過，第二個獸醫，雖然唔知隻馬曾被檢驗，但同第一個獸醫一樣，都係唔俾隻馬及格。

唔好理梁練為乜咁想隻馬跑，亦可能佢唔鍾意呢個「不及格」評級，所以就走去揀獸醫，揀到啱為止。情況就好似啲投資銀行咁，批投資產品已經被話唔達標之後，唔走去檢討吓自己賣緊乜，反而走去另一間評級公司，希望第二間可以鬆手啲。

咁梁定華同啲投資銀行有咩唔同？就係把關嗰個唔同。馬會獸醫，係馬會請返來，出糧係馬會，仲要係馬會安排邊個獸醫睇邊個馬房。有咁嘅安排，係因由創立至今，馬會將馬匹嘅安危同馬迷嘅利益放喺第一位，所以獸醫唔使驚你練馬師。

至於投資銀行同評級公司就唔同。當投資銀行出產品要評級時，係投資銀行出錢請評級公司。當然，如果間銀行成日都收唔到「鍾意」嘅評級，你間評級公司就會愈來愈少生意。結果係啲信貸評級亂來，「AAA」級滿天飛。

馬會就係知，個百年金漆招牌一定要全力維護，所以練馬師梁定華淨係冇同第二個獸醫講過話，其實隻馬已被另一個獸醫驗過，都要被馬會重罰。

所以睇到呢段新聞時，孫柏文覺得馬會獸醫遠勝評級公司，做馬迷好過做債券投資者。

作者為前石油業證券分析員，視股市為終身學習場所，不斷交學費。