孫柏文- am730 (大明燈, M33, 01/11/2010)

06年初，屋企人決定賣出住咗多年嘅樓。孫柏文聽到阿媽宣布呢個消息時，第一個反應冇乜點，就諗：「哦，咁執嘢搬啦。」當時，我哋住喺比較偏僻嘅地方，最近嘅7仔都要搭車先到，要買嘢極唔方便。其實，喺賣樓前多年，孫媽媽已話如果搬，一定搬入市區，由住偏僻樓換北角樓。但因市區樓同偏僻樓嘅呎價唔同，一搬就大屋變細屋。咁阿媽因為有煮嘢同車衣嘅興趣，淨係搬佢啲嘢，都諗住用兩日時間。

一向孝順無比嘅我，就「老馮」咁假設繼續同阿媽住，當佢搬完第一日嘢忽然問我：「阿仔，你都大個仔囉？」時，我就感受到一股濃烈嘅不安感。

我：「係阿媽。」孫媽媽：「我諗你係時候搬出去囉。」晴．天．霹．靂呀！我一聽到喊住咁話：「懷胎十月，親生骨肉，何必要咁狠心呀？嗚嗚。」孫媽媽眼見我咁可憐就答：「我唔夠地方用，你自己搵地方住啦。」

狠狠被一腳伸出門後，就即刻四圍搵地方住，最後就好似我少年時偶像陳浩南咁，搬咗去依家住緊，就快可強拍嘅深水埗天台屋。有唔識香港嘅大學鬼仔同學問起時，我都係話搬咗去住penthouse(張契真係咁寫)，仲有個skygarden。搬咗入去幾個月，即06年尾，有日突然有個婆婆拍門。原來佢係直接喺我單位下邊，低一層嘅業主，搵我嘅原因係佢放盤，問我有冇興趣。

咁我一諗，哈，打通上下兩層做複式單位，故跟佢去睇睇。睇完，我問佢要幾錢。婆婆好欷歔答：「當年97年我喺最高峰時買，用咗130萬元，依家你俾我100萬元就得。」蝕讓，輸30萬元，我被婆婆嘅經歷同心情深深被感動，所以就答：「減多15萬元先再搵我啦。」

點知過咗冇耐07年中，港股直通車嘅世界，我又定期咁再上centamap.com睇吓市況。一睇，就見到婆婆嘅單位賣出，70萬元成交。買家之後不但為單位裝飾，仲要幫公共走廊髹油，典型fixer upper格。到07年尾，就以102萬元賣出。有增值，抵佢賺。

下手就係自住用家，同我一樣係單身寡仔，耐不耐會見。不過幾個月前就開始銷聲匿跡。原來根據中原地圖網站，佢喺10月中以151萬元賣出，升穿97價！咁呢個單身寡仔，由買至賣，成個金融海嘯，有得賺都因有定力，而我都冇覺得有咩特別。點知直至噚日，我又上中原地圖網睇，同一單位只係過咗9日，又以167萬元再賣出。價錢比97高峰價高差唔多三成！

今日同大家分享嘅原因，係因為我好想喺酒吧遇到嗰個「條仔有層樓先肯嫁」嘅後生女。到時，我仲唔揸住杯長島冰茶，好猥瑣咁望住佢話：「啲人話豪宅間間都升過97價，我大廈已高三成，豪中豪。我仲要係penthouse添，不如今晚來我屋企聽吓歌，呵呵呵……」仲唔一定跟我返去？

作者為前石油業證券分析員，視股市為終身學習場所，不斷交學費。