孫柏文- am730 (大明燈, M42, 03/11/2010)

呢兩日有兩件大事有能力大幅影響全球資產價格，相信孫柏文唔使講，大家都知係咩兩件事。第一件就係美國聯儲局嘅議息會議，第二就係花旗國中期大選，分別為參議院選三分一議席及眾議院全部嘅議席。

先講量化寬鬆。相信大家聽預測聽到厭。今日有如以前澳門未開放賭牌前，我去玩「大細」，好多時全枱已落晒注，但仲有半分鐘先開嗰一刻。張枱有一種充滿張力嘅寧靜。幾多千億，甚至萬億，根本唔重要，因聯儲局一定喺張會議聲明上，最後加句：「如唔夠用，誓必再印！」只要有呢句，究竟係咪如一般揣測聯儲局真係印5,000億美元(約3.9萬億港元)，已經唔係重點。

只要源源不絕，有個「有錢人」不問價咁狂風掃落葉入貨，資產價格將不斷上升。以上嘅分析相信連前牛頭角邨街坊阿順嫂都知。咁有冇變數？有，就係花旗國嘅國會中期選舉。根據民調，今次共和黨將大勝，一般較懶嘅評論員及分析師都會睇吓歷史求其話：「共和黨反加稅，商人有利，股市會升。」

點知一撞到睇開《am730》，故對世事瞭如指掌嘅你，就可能客氣咁話：「今次好似唔係咁喎。」冇錯，因唔似香港，美國政黨內部參選嘅代表係會不斷轉變。例如08年民主黨，黨員唔想見到布殊、克林頓、布殊、克林頓嘅政治王朝，又不滿克太支持之前係主流嘅伊拉克戰爭，就搵咗做國家級議員都未滿一屆嘅奧巴馬做黨代表選總統。今次，共和黨一樣。之前嗰啲共和黨議員，特別係支持過救市、救銀行方案，就算在任，有唔少喺黨代表選舉時，被拉下馬。換來就係「茶黨Tea Party」派成員。茶黨個名來自佢哋Taxed Enough Already(即「納夠稅啦！」)嘅口號。 睇落，好似係同以前共和黨一樣。如果你咁諗就錯。

茶黨嘅誕生，好多人話係因一段幾分鐘長嘅短片，係09年初新總統上台不久，美國財經電視台CNBC一名叫Rick Santelli嘅主持人，企喺債券交易場中大聲話：「政府點解要繼續鼓勵不負責任嘅人？你咁做就只會扼殺嗰啲揀得啱嘅人嘅未來？」當佢一路講，喺佢附近嘅交易員拍手和應時，佢就擰轉頭問附近嘅人：「你哋邊個想救一個有間啱啱加裝多另一個廁所嘅屋，但找唔到數嘅業主？」佢一咁講，交易員再起哄。

當直播室主持話：「睇來唔少人支持你嘅講法喎。」Santelli就答：「奧巴馬總統，希望你聽到！」點知，20個月之後嘅今天，證明奧巴馬冇聽到。聯儲局搞量化寬鬆，就係想以摧毀美元購買力，托樓價救當年不負責任樓房買家。美國做得全球最強大之國，有賴其選民眼光同選舉系統。今次選出茶黨，聯儲局喺選舉後印鈔自由度或大減。要負責任嘅自由市場主義抬頭，對人類資源分配同使用絕對有利，但對資產價格就可能非常危險，大家小心。

(作者為前石油業證券分析員，視股市為終身學習場所，不斷交學費。)