孫柏文- am730 (大明燈, M40, 24/11/2010)

港交所(388)董事會決定將交易時段中間的午飯時間，由依家兩粒鐘，減到去一粒鐘，但會先有一年的個半鐘過渡期，港交所主席夏佳理話，有可能會再研究取消午飯時間，之後立即受到證券界批評。唔使多講，孫柏文以前做石油股分析員嗰陣，已經要早上五點九起身，你哋要更早開市，就真係祝君好運。

印象中，延長交易時間呢個建議，同政府訂立最低工資之後話又要研究最高工時，差唔多同期出現，同時亦都係行政會議成員嘅夏佳理，究竟覺得延長工作時間係好事，定係縮減工作時間先係好事呢？千祈唔好同大家講，港交所雖然增加咗交易時間，但第日草擬嘅最高工時，又會令證券界人士可以準時收市放工，我諗講出嚟，都未必有人信。

講開最高工時，立法會令生產力較差嘅一群工人受害，手腳唔夠快嘅，絕對係高危一族。不過，更大嘅問題係，審理法例嘅議員質素太低。

喺立法會入面，雖然有工會代表自稱研究最低工資幾十年，又或者有大律師，但竟然冇一個諗過食飯時間計唔計落工時，結果，任由一條千瘡百孔嘅法例通過，令工人差啲不加反減，呢班議員一啲悔意都冇，為咗掩飾自己過失，就話係食店唔啱，其實最唔啱，係班立法會議員。然後同一班人走出嚟同你講，要再下一城，要立最高工時，真係聽到都驚。

特區政府入面，部分高官有鋪出風頭癮，覺得自己愈戰愈勇，好似之前我哋有環境局長邱騰華，一上任以為拎「環保」兩隻字出來就做乜都得，結果搞出慳電膽事件，成為問責局班底內最大嘅負資產。

特區高官最易犯嘅錯，就係誤以為有立法會議員，特別係泛民議員支持，就會放膽去推新政策。好似慳電膽券，其實本來係公民黨嘅政綱，邱騰華以為環保加埋泛民，就天下無敵，卒之出街之後，第一個批鬥邱騰華嘅，就係泛民同埋環保分子。

另一位最有潛力步邱騰華後塵嘅高官，就係勞工及福利局長張建宗。孫柏文唔擔心佢萬箭穿心，因為就算係，都係佢自己攞嚟，最擔心佢又推一條天殘地缺嘅「最高工時」草案，一班議員再次諗都唔諗就投票支持，歷史重演，再令工人受苦。

依家口響響話要支持最高工時嘅立法會議員，應該要白字黑紙寫明，如果第日立法，令工人收入不加反減，就立即辭職，以明其志。

不過，呢班卸責議員一定唔會咁做，佢哋最多都係出事之後轉移視線，去賴其他人，工人受害？又有機會俾佢哋抽油水。

我哋要學例如美國等民主國家，佢哋係冇法律好過壞法律，唔似我哋咁，壞法律好過冇法律，揩嘢先搵人出氣。唔怪之得阿爺唔俾普選。

(作者為前石油業證券分析員，視股市為終身學習場所，不斷交學費。)