孫柏文- am730 (大明燈, M36, 20/12/2010)

又到聖誕佳節，又到孫柏文呢啲單身寡仔最感孤獨之時。不過好彩，因為作為一個前雙失青年嘅我，一向都驚隨時被炒而同時做緊幾份工。其中一份工，喺平安夜會玩交換禮物，舊年都有玩。規則得一項，就係件禮物要貴過一百蚊。

舊年嗰次，我就好花心機咁諗買乜。最後就抱住「希望啲人點對我去對他人」嘅心態，決定用高過最低消費嘅倍數，買咗包我最鍾意食嘅磯燒元貝去交換。食，最實際。

點知到交換日，我嗰個陰盛陽衰工作組中嘅一眾港女同事，一見我嗰份禮物就噓聲四起。就算最後俾個男同事抽中，港女們都要鬧到今年都未鬧完。仲要前幾日我開玩笑話已準備好今年包元貝時，居然俾個就快係中女嘅同事贈咗句：「你不如食晒佢先嚟喇。」

有見及此，我將包元貝貶成Plan B，四出問識得嘅港女朋友，應該買啲乜先唔使捱批。其中一位就建議買iPhone4或iPad，聽完我就問：「會唔會太行貨呢？」咁個港女朋友就話唔會。Apple(蘋果)真係勁，賣咁多，周街都係，咁樣港女都仲想要。

相信大家都會覺得，Apple產品大賣呢樣嘢，都唔係特別新聞，公司盈利當然節節上升。咁Apple呢間近3年盈利升幅，同市盈率有37倍嘅騰訊(700)、43倍嘅阿里巴巴(1688)一樣咁勁嘅公司，本身又係幾多倍市盈率呢？30倍？40倍？50倍？錯！其實係得21倍。咁點解睇落，又好似抵過其他股票咁多呢？理由好簡單。Apple喺九十年代中時，差啲執笠，去到九十年代尾Steve Jobs回歸，先起死回生。市場認為，Jobs先生單人匹馬做事，蘋果冇咗佢就會唔得。不過佢呢幾年一路都受到癌症嘅困擾，公司喺總指揮唔知會唔會出事嘅陰影之下，就面對市盈率長期比較低企嘅結果。一旦真係有乜冬瓜豆腐，蘋果股價一定暴跌。當你個發霉單位係靠一個人復活，嗰個人有事，個單位就大鑊。其實，特區呢幾日都有同一現象，如果呢個前發霉單位有上市，股價一定暴跌。呢個單位係乜？咪就係香港電台嘅星期日節目《城市論壇》。單人匹馬幫呢個節目由年初開始，起死回生嘅任亮憲出咗事，影響甚大。

多唔好講，噚日《城市論壇》嘅收視一定好勁，不過講真，有幾多個觀眾，係為咗個議題去睇？個個都係想睇維園阿哥(任亮憲)究竟點，即係花旗國電視圈人話嘅「公路炒車」型「娛樂」，對面線司機收慢油睇嘢嗰隻。

最慘就一定係主持謝志峰，因為佢滿肚agenda，一向同班主張港人無需要為自己慘況負責嘅社福演員們裡應外合。依家佢哋隻頭馬搞成咁，個agenda即時冇得推。唔好話《城市論壇》，如果特區社會主義有上市，就係時候沽爆佢。仲入社民連？快啲低位入成功去除社會主義癌腫瘤嘅民主黨啦！

(作者為前石油業證券分析員，視股市為終身學習場所，不斷交學費。)