孫柏文- am730 (大明燈, M40, 06/12/2010)

自從爆料網站維基解密(WikiLeaks)，將一大批美國機密文件公開之後，火速成為全球關注焦點。雖然幾乎所有歐美先進國家嘅領袖上台時都話，要公開公正高透明度，今次維基解密做咗個「順水人情」，幫佢哋做到有咁透明得咁透明，點知多國元首惱羞成怒，想盡辦法拉人封站。結果反而令維基解密嘅公信力大幅上升，全世界人都知道，今次係堅料。

喺呢單嘢出現之前，大家一講Wiki，都一定係講緊網上百科全書維基百科(Wikipedia)，咁啱新冒起嘅維基解密，又係叫維基。有好多人問孫柏文，究竟維基解密，同維基百科有冇關係？究竟係咪有一個叫做維基集團？

其實兩者並冇關係，喺維基百科上，在有關維基解密嘅條目中，維基百科仲煞有介事咁寫明，兩者係冇關係嘅。

維基百科創辦人James Wales更加公開澄清過。之不過，點解大家都叫做Wiki維基呢？就同第一代Wiki嘅創辦人有關。

喺1994年，有一個叫W a r dCunningham嘅程式員，正係開發緊一個俾程式員更加容易交流意念嘅Database，到改名嘅時候，起初諗住叫佢做「quick-web」，後來佢去夏威夷嘅檀香山國際機場時，當地職員叫佢坐「Wiki Wiki」穿梭巴士來往客運站，而夏威夷人口中嘅Wiki-Wiki，即係解「好快好快」，所以就將個database，命名做Wiki。

因為當初個database係有分享內容嘅作用，之後Wiki慢慢引申出由「用戶╱讀者自己寫」(user-generated content)嘅意思，所有，wikipedia同wikiLeaks嘅關係，只限於大家都認同呢個精神。他朝可能有維基日報、維基股票報告、維基馬經添！

至於今次嘅爆料事件，挑戰嘅唔止係美國政府，更加係挑戰所有權貴，能否維持落去，關乎網上言論自由。

如果捱唔過今次嘅風浪，喺各國用盡手段，下令所有供應商包括接收捐款嘅paypal，以致Amazon等各國伺服器供應商都唔敢同佢做生意，如果到最後倒閉收場，即係證明網上世界係冇言論自由，只要得罪到權貴，佢哋都會想盡辦法，令到你斷糧斷水，無法經營，甚至抹黑到你失去公信力。

維基解密創辦人Julian Assange被瑞典政府指佢同幾項性罪行有關，案件涉及兩位女性，事後發現，其實兩位女性係佢fan屎，都係同佢自願發生關係，警方亦都證實咗呢點，但因為發現原來Julian Assange唔係真心相愛，於是就後悔，並且去告佢。點解咁都有得告，原來瑞典有法例，就係男人同女人自願發生關係都好，如冇戴安全套，都係男人犯法。當時Julian Assange係有用安全套，但係就穿咗，所以就俾人告。

(作者為前石油業證券分析員，視股市為終身學習場所，不斷交學費。)