孫柏文- am730 (大明燈, M33, 13/10/2010)

上個禮拜，最能代表美股嘅標普500指數，返番去兩年高位嘅1,240點水平，即係已升穿11月初，第二輪量化寬鬆措施(QE2)宣布時嘅高位。

 

本來大家應該同孫柏文一樣，都期望港股同樣有力上番兩年高位，即係超過25,000點水平，可惜港股就係唔爭氣，幾個星期都係反覆唔郁，仲喺23,000點水平上落，冇跟隨美股升勢，令到每朝起身見到美股造好嘅港股call輪持有人非常失望。

大家可能會問：點解香港會落後得咁緊要？其實，大家都擔心內地會加息來對抗通脹，萬一內地突然加息收水，將資金抽走，隨時引發小型股災，所以大家都唔敢貿貿然入市，就係呢個原因令到港股浮浮沉沉。

上個禮拜五，中國人民銀行(人行)終於有決定，結果唔係加息，而係宣布只係加存款準備金率0.5個百分點，採用溫和手段。

換句話講，即係今年之內好大機會都唔會再加息，將之前憂慮一掃而空，絕對有力追番港股落後美股嗰2,000點，隨時會觸發過年前升2,000點的大升浪。如果今日港股升500點，就當係抑壓咁耐升住啲先啦！

最近，富商X事件成為全城熱話，由於仲上緊庭，所以孫柏文唔評論呢件事。不過，呢件事就令我諗起李嘉誠同埋軒哥呢兩位善長仁翁，大家都只不過係想做啲善事，幫吓人，助人為快樂之本嘛。

可能社民連嘅宣傳太有效，所以軒哥就自願進行財富再均分，將佢阿嫲俾佢「買嘢食」嘅4萬蚊，全數用嚟幫助校內嘅有需要人士，捐出嘅收入比例達百分百，就連誠哥都比唔上。

特別係軒哥派錢一事，順手證明香港學生好有教養，同學仔連派錢都會排隊，不知幾有秩序，換轉喺內地隨時會變成武裝暴動，派錢嘅人會被毒打，然後成嚿錢搶咗去。足以證明香港嘅下一代，無論係施予者，定係受助人都有好高嘅質素。

李嘉誠同軒哥最大共通點，就係兩個都希望做善事之後，能夠得到受助者嘅感激，例如叫番佢一聲軒哥咁大把，然後就將家財獻出。

偏偏香港一啲覺得政府萬能、好想政府介入一切社會運作嘅人，對軒哥嘅行為睇唔順眼，覺得要求受助人叫佢做軒哥係唔啱，做善事一定要好秘密好秘密咁做，如果唔係就係沽名釣譽，或者亂咁使錢。

其實喺佢哋心入面，最好乜都係政府做晒，希望政府搞財富再均分，但係私家搞財富再均分就係萬惡。

唔通係因為軒哥將錢直接交去受助者之手，令一啲靠販賣善心嘅組織冇油水抽，所以最後惱羞成怒？嗰班人如果真係咁有善心嘅話，唔知又可唔可以學軒哥咁樣，將收入百分之一百咁捐出嚟呢？

(作者為前石油業證券分析員，視股市為終身學習場所，不斷交學費。)