孫柏文- am730 (大明燈, M33, 12/01/2011)

有兩個片段，每一次喺各大電視新聞節目見到時，都會令孫柏文搲頭。因為根據常識，好似冇可能同時出現。例如，如果大家去過夏威夷嘅話，就分分鐘試過被陽光直接曬住之際，同時又會被雨淋到。

咁邊兩段片段時時令我?頭呢？第一段就係每次國泰航空(293)進行招聘會時，啲人好踴躍咁走去申請入職。第二段就係，國泰工會又宣布搞工業行動嘅記者招待會。

點解?頭？因為除咗啲唔睇價錢就使錢，嘥錢唔入肉嘅政府官僚外，有咁多人想入行，理應冇可能要搞工運。就算搞，都冇用。因為當員工聽工會裡啲工運演員說話，返工玩嘢時，搵人換咗呢啲員工就得。

仲有，喺國泰呢啲提供服務嘅行業裡，根本每班機嘅每一個搭客都係唔同，係新case士。工會最鍾意嗰啲一刀切、勤懶不分嘅薪酬制度，唔好話人工加定唔加，只要一刀切，表現如何都一樣咁待遇，就要老土講句，最終一定會劣幣驅逐良幣。仲要係員工唔變都有以上驅逐嘅現象。

多唔好講，你公司以前論功行賞，做得好就人工會加多啲。突然有個當年JUPAS驚入唔到大學，第25選擇揀社會學系，仲要不幸真係讀社會學嘅80後同事，有日喺pantry叮飯時話大家要「團結」。

咁你就問呢位讀好多書嘅同事咩叫「團結」，佢話要集體要求公司劃一加薪，唔可以俾公司玩個人針對。你聽完，啱啱盒飯叮好，返位食，仲要一路食，一路覺得嗰位超似維園阿哥嘅同事都好似有理。

直至公司真係為員工做appraisal時，你發現公司真係好聽呢位社會學80後同事話，有「企業良心」。你隔籬嗰個日日喺電腦browser打flash game，做嘢超慢嘅同事，加薪幅度同你一樣。你知道後會點？你都打flash game啦！仲有，如果你係啲掂嘅員工，真係見到呢種「企業良心」型嘅管理手法，一定盡快搵工走。

最後，大家唔好諗住唔搭飛機就唔關你事。因為今次國泰工會個工運演員搞手，就係冇做過一日機艙服務員嘅曾國豐，不但係工運影帝梁耀忠嘅徒弟，仲要係公民黨嘅「經濟及公共財務政策支部主席」。唔合符常識，真係公民黨嘅專利，冇人會敢挑戰！

(作者為前石油業證券分析員，視股市為終身學習場所，不斷交學費。)