am730 (大明燈 M42, 2011.4.27)

昨日睇完報章頭條，個心寒一寒，亦都慶幸自己放早前買落層樓。原因？我唔係話樓市見頂，因為香港樓市根本係變幻莫測，大部分分析員都睇唔準後市，估計全年樓價升約10%至20%、甚至更多，我只會覺得多餘。依家市場俾個答案大家。

就係話你知，在樓市搵錢好易，入行仲容易。3個80後，因為晉身地產經紀行業，年薪過百萬元，仲要全部大學都唔使讀。

睇到呢度，我開始為部分80後傷心，呢個年代，好多80後都係大學畢業，部分仲搵緊五位數字唔夠的月薪，(唔好笑，最低工資5月1日實施，有行業真係頭痕緊點搞，唔好話掃街、旅行社領隊，甚至記者都係最低工資受惠者)叻，做律師、醫生，五、六、七、八萬元一個月，都唔夠經紀有佣分咁過癮，閒閒一年搵過百萬元。

至於呢種報道手法，耳濡目染，就係話香港地搵錢好易，啦，啦，加入經紀行列包你得。當市場有呢個諗法的時候，亦就係危險的開始。最易賺錢的地方，就係最易跌低。

仲記得97嗎？當時經紀行業風風光光，經紀數目有成3萬個，依家，都頂位，又係3萬幾個，講真，又多個樓市見頂指標。

咁遠，大家可能已經遺忘，近，今年年頭，政府推出措施打壓樓市，經紀嬲到上街，話政府整死佢，平均佣金收入，由12,000元，跌到得番9,000元，急挫近三成，當時冇人認為樓市見頂。

依家有經紀大搖大擺出來做訪問，話賺到搵到，唔知政府會唔會再出招打壓樓市呢？數下手指，政府兩、三個月出一次招，依家時間亦好，政府高官，你準備好未？

呢個報道令我又聯想起，政治動機。今日將會賣地，一幅紅磡地皮，大地主長江實業(001)，市場睇好會搶，再次奪標。報道一出，明顯想摑政府一巴，賣地成績又可能火光熊熊，不過咁，要舉手的地產商，唔會睇唔到個市咁「熱」，你睇，連新鴻基地產(016)在元朗都一次過推晒貨出來，你估郭氏家族唔識諗？

或者今日賣地時，大家將個反高潮，齊齊唔舉手，到時有人就可以冷手執個熱煎堆。

樓，我唔熟「架步」，反而係關心80後。我認為部分人知道呢個新聞故事，會走去發奮，會以做地產經紀為其人生目標，不過，孫柏文提醒你，經紀係「旺市搵埋淡市食」，風光背後，頭版位在旺市兩層樓的女生，幾年後，我唔想見到你變為負資產。亦都唔想睇到一間又間經紀行摺埋，你要走去轉行。

80後部分被標籤鍾意「hea」，呢份工，淡市有得hea，旺市要搶客，想搵錢，唔該大家唔好諗住搵快錢之餘，又可以hea，孫柏文都係三十幾歲人先搵到第一桶金！