am730 (大明燈 M33, 2011.8.8)

呢個周末，孫柏文企咗喺獅子山頂，遠處瞭望各大有金融系嘅大專院校校園，睇吓係咪烽煙四起。大家可能會問：「點解會有咁嘅衝動？唔通啲90後玩暴動？」其實，我只係想知道啲大學有冇集體燒晒啲教科書啫。


讀過finance嘅人，就算只係一個學期，其中嘅一個course，都應該讀過一樣叫做capital asset pricingmodel，簡稱為CAPM嘅嘢。理論上，CAPM就係用來計吓究竟某個資產賣緊嘅價有冇值博率。

咁有冇值博率，就當然要包括唔少考慮，例如估呢個資產未來嘅回報、收入係點，有冇其他投資可選擇，風險同回報嘅關係又係點等等，如此類推。

而其中一個最核心嘅計算變數，就係條方程式要知道「無風險回報率」有幾高。咁喺花旗國同我哋七點八嘅特區，「無風險回報率」係乜嘅model answer，就係美國國債嘅息率，因為借美元俾美國政府，佢哋就算山窮水盡，都仲可以印銀紙去還。點知，成日俾我笑「不誠實使用電腦」計次按債券風險，豬屎垃圾都「AAA」級嘅信貸評級公司Standard& Poors(標準普爾)，居然將美帝評級下調。即係有風險！

咁即係再冇「無風險回報率」！CAPM冇得再誠實地計，老師再教，就好似喺汽車時代教開馬車一樣，分析員再用，都只係用「假設」來搵笨。今時今日啲CAPM教科書，就應該同08年教「如何將收入流證券化」嘅教科書一樣，就算唔一把火燒咗，都應該攞去回收。

點都好，今次下降評級，真係唔知會有咩結果。

記得當年美國雷曼兄弟爆煲之後幾日，我走咗去下亞厘畢道參加咗一個一早已經約咗，由曾司長作主席嘅諮詢會，睇吓點幫特首嘅施政報告。

會後，其中一個智庫嘅話事人，當時亦係港交所(388)嘅董事，就行去曾司長旁邊，用了最冷靜嘅語氣講咗一句：「There seems to be asettlement issue at the exchange。」咁因為偷聽行為確實冇品，所以我冇聽落去。

不過如果喺08年，我同你話美國有一間投資銀行爆煲，會搞到畢打街，有人玩「叮叮喳喳」，大嗌「還錢！還錢！還錢！」你都會話我當時係黐咗線。

不過，最後，孫柏文都係要提提大家，今次美國被調低評級，雖然屬於大件事，因為標普話今晚星期一美國時間再玩「好多金融機構，一齊大降級」，但都唔係今個禮拜最大鑊嘅新聞。

因為據《Der Spiegel》報道，德國政府卒之向現實低頭，宣布意大利嘅問題，大到連德國政府都救唔到，佢死佢事，分分鐘會令全球喺今個星期，出現08年海嘯式嘅跌市，call loancall到飛起。所以有現金喺手嘅朋友，準備啦。