am730 (大明燈 M24, 2011.8.15)

剛過嘅周末， 孫柏文撞到個Auntie，佢話：「之前買咗股票嘅，個個都變咗做咗個林峯！」我問：「係咪睇住現價時，諗起個打和價，就忍唔住要唱『前事最怕有人提起，就算怎麼伸盡手臂，我們亦有一些距離』呢？」Auntie答：「咩歌嚟口架？Anyways，個個股民都係chok樣，喺個市chok成咁嘅樣！」

股市估市，估啱估錯都好，亂世中，輸少當贏，坐艇嘅，我勸你分段減磅。因為如果閣下仲諗住，美國總統奧巴馬為咗連任，會炒番㷫個市，推第三輪量化寬鬆措施(QE3)會有睇頭的話，簡直係自欺欺人。撫心自問，自從08年金融海嘯之後，我哋經濟有冇真正好過？隻人造牛幫你在股市搵到幾多？

用開《大明燈》引路嘅朋友，都知好耐之前，孫柏文已經All cash on hand，一直等緊投資機會。講真，呢段時間，個身真係有痕過，有衝動入市，不過，知道歐洲咁大件事，我仲成日出來講俾人知，意大利有幾大鑊，最終都係理智勝過衝動，冇衝入個市度。

結果喺上星期，眼見市場來個大恐慌，我買咗嘢，買咗勢估唔到的地產股。結果大家都知，坐艇！不過，理智再一次喚醒我，叫我沽咗佢，免得坐到變潛水艇。所以我都係做咗一、兩日艇仔咁多。

好啦，係時候俾啲投資建議，係都要買股票嘅，就不如湧去高息啲嘅股份。我watch list上有，領匯(823)，呢隻股息高係人都知，不過個價硬淨到要寫個服字俾佢，個市chok到上天，佢都係跌到落25蚊水平，早兩日，仲識翻身去27蚊，咁高質素，逆市中，都算非常不俗。又要買、又驚輸，就係買呢啲。

風雲人物，點都要提聯儲局主席伯南克。一眾業主要多謝佢。2013年先可能會加息，令到好多業主都有覺好訓，唔使再劈、劈、劈價，就算政府出幾多招都好，個息咁低，業主要守，點都頂得住，唔使同買家傾來傾去。

有如本報主席喺電視節目被我問時答，最慘都係經紀們，生意慘淡，相信業主同買家嗰種膠著狀態，有排都搞唔掂。唔知大家有冇印象，香港市民供樓，之前可以揀最優惠利率(P)，抑或Hibor(銀行同業拆息)。當時，大家都睇死用Hibor啲買家，睇死佢第時加息，就會成身蟻。結果係，喺伯南克英明領導之下，劣幣驅逐良幣，劣性行為有回報，良性冇回報。

依家用Hibor嘅買家，笑不攏咀，計一計數，09年初，用約二百萬元買層樓返來，利息開支約千零二千幾蚊，收埋好幾千蚊租，再供埋，大把錢剩，結果呢兩年，人哋就可以輕輕鬆鬆袋五位數字。依家話到2013都係咁，乖乖嘅人，死未？所以話，今次嘅最大教訓係，愈曳愈著數、愈乖愈要死！