am730 (大明燈 M31, 2011.8.17)

早排如果大家有留意，就係有兩班好有實力嘅人，同時搞創投基金，投資落啲80後嘅創業大計。第一個基金，就係《am730》主席施永青，透過自己慈善基金搞嘅，另一個就係《商台互動》，同一眾富有創業經營，成功創辦過好多個企業嘅社會前輩搞嘅。其實，大家可能會問：「80後成日被人評為『唔掂』，佢嘅搞啲咁嘅嘢，係咪又係嗰啲低能社企？當做善事，救濟吓呢啲人？」

哈！如果你咁講就真係低層次。呢兩個單位，都係我嘅米飯班主，有咁嘅眼光請到我呢啲才俊，當然係勁，點會做啲咁低能嘅事，創投基金變做慈善。

兩大基金，應該都係被同一信念推動，就係當市場出現一竹篙打一船人時，市場中就一定有啲價錢同內在嘅價值出現分歧。至於當呢個分歧夠大嘅時候，就有獲得豐厚利潤嘅機會，就係因為傳媒捧到上天嘅嗰批80後，好多都係搞社運，佢嘅啲同輩開口話要錢做生意時，分分鐘未開口，你已經話：「非牟利社企？Thanks，but no thanks。」市場有咁嘅歧視，仲唔係尋寶良機？孫柏文我有幸有份參與《商台互動》，叫「80後創百萬夢」嘅創投基金，成為投資者顧問團成員之一，其中一項工作，就係要睇晒所有寄入來嘅計劃書，作第一輪甄選。首先我想講，落筆呢一刻，成組人係未有定案，究竟邊個計劃可以入圍，不過，呢幾日睇咗咁多份計劃書之後，真係有啲見解想同啲寫計劃書嘅人分享一下。

第一，就係可唔可以好簡單咁講你公司做咩口架呢？簡單成點？例如，如果當年係想搞可口可樂，一句「有汽糖水，解渴」就夠。

如果你係想創辦國泰航空(293)，就「坐飛機到目的地，亦安全過坐高鐵」。

甚至係想搞《am730》話，可以話「報紙，好睇，亦唔使錢」。今次，我就撞到唔少寫成版紙，睇完都唔知佢想做乜的計劃書。

第二，就係做財務預測嘅時候，唔好同我講話：「個市場每年就有20億咁大，我哋會喺3年內，搶到百分之幾嘅市場佔有率………」應該點做？就係「公司請每個每月底薪8,000元嘅sale屎，要每日見7個客，當中要有0.5個成功幫襯買一件產品，公司就會有盈利，因為毛利率有………」其實仲有好多關於寫start up計劃書嘅建議，不過，呢兩個就真係我覺得最緊要。

最後，我知道大家可能都好關心我有份做嘉賓嘅電視節目，近來嘅最新發展。噚日，大家可能都有睇到前輩胡孟青(青姐)周二在《am730》篇文章。今日，我很想同青姐講一句：「I am just keeping your chairwarm,hoping and praying for yourswift return。」