am730 (大明燈 M31, 2011.9.05)

上周五，花旗國股市收市後，如果唔知發生咩事嘅人，必定估六月飛霜，因滿天係白色嘅嘢。見美國政府泵呢啲白色嘢時，估係咪又申辦冬季奧運會，要示範佢哋啲人造雪有幾勁，就喺暑假最後嘅周末漫天風雪。但睇真啲原來唔係雪，係一封封嘅律師信。係花旗國政府正式代表兩房控告多間銀行，因當年樓市泡沫最瘋狂時，將好多狗屎(唔好鬧孫柏文粗俗，唔係我咁叫，係投行內部咁叫呢啲產品及債券)、垃圾賣咗俾兩房當補品。但美國政府唔喺呢刻告又唔得，因剩番幾日就過咗告嘅期限，故有理冇理掟啲律師信出來，霸番個控告權先。你諗吓，如政府連告都唔告，全美造反都似，總統奧巴馬簡直為連任機會簽死亡證一樣。呢場官司聲稱牽涉按揭值約2,000億元，做嘢，在所難免。

政府時間上逼虎跳牆，有冇勝算好難講，兩房雖非唔係每日喺畢打街喊 [ 還錢]級嘅投資單位，但一旦法庭來料，起碼俾得起錢嘅銀行，就可能要賠。最少可能要原價贖回加罰款。講起俾得起嘅銀行，被告得最甘嘅係美國銀行，但佢嘅冇錢，告佢都冇乜用。就算政府贏咗，都要再代表財政部注資入美銀，成場大龍鳳，只益律師。睇名單，就有間銀行幾年前因有骨氣，唔攞政府錢而被官員們覺得有得襟，呢間就係滙豐控1股(005)。

依家美國就為當年值62億美元嘅按揭而告滙控，一旦滙控敗訴時，要為呢批按揭全面撇帳，直接蝕股東資本。提提大家嘅係，當年28蚊供股，都係向股東籌咗185億美元。滙控派息又要凍過水？大家可能話：[ 點解呢啲咁嘅美國按揭，搞極都未掂？] 其實，我落筆時唔知滙控股價有冇受呢單官司影響而下挫。喺雷曼爆嗰陣，我曾話用行政手段救雷曼苦主係 [低能]嘅原因，係金融海嘯一路係大家唔知或唔肯認自己手上資產值幾多，但仲知欠人幾多錢。呢場官司最危險嘅係，當一眾銀行敗訴，要為所有已出售嘅按揭賠錢，有冇人知佢嘅會欠人幾多錢？以漢堡包店為例，上限為因雪櫃壞咗要報銷手上存貨。今次卻要為所有賣過嘅漢堡包負責，死未？

如果連兩房都可以話自己係 [畢打街長期示威者]級嘅投資者時，咁有邊個可被標籤為專業投資者，明知買咗垃圾，但希望博一博？呢啲投資者就著數晒啦，買完垃圾，冇事贏大錢，有事又可跟兩房有錢賠。下次有信貸泡沫時，連澳元累計期權都唔好炒，買呢啲垃圾產品安全。

德國國會要為希臘救市方案投票而忐忑，我深表明白。因為攞得錢，就希望攞番啲嘢，如小島、資產或收稅權等，香港嘅用詞係割地、賠款和宗主權。子彈、火炮或坦克車喺幾百年來都做唔到，一場為救銀行家而出力救市行動就得。你話30年後香港冇錢好似希臘時(工聯會及李卓人話全民包括富豪退休人人派錢方案可維持30年)，北京立法單位去」 救 [我]我哋嗰刻，啲議員嘅心情係咪一樣咁忐忑呢？