am730 (大明燈 M38, 2011.9.14)

「希臘係唔可以喺失控情況下走數」，噚日，獅子山學會行政總監王弼引述咗德國總理嘅一篇報道，寄咗俾我哋學會裡嘅兄弟姊妹，仲要自己加多句話：「即係受控嘅情況下可以俾希臘賴數啦！」歐洲債務危機搞咗好幾年，似就到決定性時刻，作為股民，甚至只係有資產嘅人，又如何是好呢？要部署好迎接呢個可能性，當然要估喺希臘走數後發生啲乜。之前好多孫柏文嘅行家，不論係陀地或老外，都話呢場歐洲債務危機一定「搞得掂」。因喺經濟層面或計數後，根本唔應再泵錢俾借唔到錢嘅歐元區成員都好，由於歐盟係政治產物，所以一定會保住呢啲國家，唔俾歐盟散。

呢個論調我同意，問題係咩叫歐盟「散」呢？例如，有歐元區成員國離開歐元區算唔算散呢？有強勢嘅歐元區政府國會，話唔肯再出錢救弱勢嘅，又算唔算呢？如果算，就根據之前嘅論調，當然唔會發生，不過唔算散，咁係咪即係希臘係會因冇錢、再借唔到錢、再冇人救而走數呢？

喺呢一刻，市場呢個預測未來嘅機器，透過希臘一、二、五、十年期國債嘅價格同息率，已經話到明佢哋會喺12個月之內一定走數。因為個問題已經唔係希臘政府有冇開源節流嘅政治勇氣，而係希臘經濟萎縮嘅速度，已經令佢嘅政府冇可能能夠滿足救市泵錢條款。如果要又走數又要歐盟唔散，有咩辦法呢？

如果你喺08年問我，我會搬番以前我聽過嘅一個說法出來，就係當你欠銀行100萬元還唔到，呢個就係你嘅問題，當你欠銀行十億元還唔到，呢個就係銀行嘅問題，相信大家可能都聽過。不過，當年我就加多一句，當你欠銀行1,000億元還唔到嘅時候，呢個就係中央銀行嘅問題。所以問解決歐債危機嘅辦法時，我只會話：「靠央行印鈔票啦！先有現鈔俾人過難關，再靠貶值去減債。」

不過，呢幾日我開始發覺，歐洲除咗有統一嘅貨幣外，仲有幾樣幾得意嘅概念，就係民主、法治同佢哋幾百年來內耗戰亂嘅記憶。呢幾樣嘢，喺特別德國好有影響力，亦因為佢哋嘅希特拉喺上世紀三十年代上台，係得力於二十年代末的一場超級通脹，所以佢哋嘅國民選窮，都唔要通脹。

當有人唔還錢，就有人要輸錢。靠通脹減債，就係要所有持有該貨幣嘅人輸，如果冇通脹，就係要睇錯嘅債主輸，咁希臘嘅債主就係啲銀行，故德國國民就係似要銀行硬食咁輸。

希臘走數，如果真係有如信貸評級公司Egan Jones估計，走九成，希臘到時絕對可以留喺歐元區。而銀行，特別係法國同德國啲銀行就會資不抵債，到時嗰兩國嘅政府，用番原本救希臘嘅錢救番自己啲銀行就得。所以我相信，希臘宣布走數嗰日，法德兩國政府亦會同時宣布注資，甚至國有化自己啲銀行，如歐洲真係採納呢個最均真方案，學商品大王羅傑斯話齋，歐元必買，因將會最保值。