爽報 (金融一條針, 2011.10.31)

競爭法，政府差點就要再讓步。點估到，吹雞完場之前，竟然無端端爆出一單「太古汽水欺壓759阿信屋」事件，形勢又出現變化。至少，一直標榜「代表商界利益」，反對訂立競爭法的自由黨，都派出青年團代表，去太古送信，要求人家向消費者和中小企道歉。

劉健儀啊，劉健儀，究竟你要到幾時先至明白，香港人最睇唔起兩面三刀見風駛裡偽君子？就算今日自由黨轉軑支持政府通過競爭法，市民亦唔會因此對自由黨改觀。不過，一向支持自由黨的財團，又會點諗？既然今日自由黨可以去太古抗議，聽日點解唔會支持八萬五，後日又唔會撐梁振英做特首？

據了解，香港商界各路人物，其實老早就覺得自由黨次次都「開口夾著脷」，越幫越忙。外邊形勢一轉，自由黨又永遠第一個掉轉槍頭。今後自由黨如果被人斷水絕糧，要怪，就怪劉健儀連守龍門都做唔好。順帶一提，自由黨夠膽派人踩上門，客觀事實已經說明，太古無做政治捐助，大家千祈唔好諗太多。

太古一直存心做高層次生意，以為可以遠離低層次政治公關，結果便落得被屈機收場。至於759阿信屋老闆林偉駿，本相是上市公司CEC控股大股東億萬富豪，大眾媒體順水推舟，將他塑造成弱勢社群，太古之後要講道理就難上加難。

講句公道說話，太古作為老牌洋行，行事亦素來有規有矩。太古業務遍佈世界各地，外面有反競爭法，香港員工也得守同一套準則。太古向759阿信屋提出「建議零售價」，競爭法術語叫RPM（Retail Price Maintenance）；世界各地的案例，大多數容許有限度RPM。

零售消費這一行，下游零售商將貨品鋪陳出來，對上游品牌持有公司有宣傳價值。零售點位置好，租金也自然貴一些，但產生宣傳價值也大一點。RPM就是要避免零售商之間出現惡性競爭：大家都不再投資搞好鋪位門面，然後一味鬥平鬥多。事實上，在沒有RPM的行頭，大品牌擁有人一樣要花錢宣傳推廣，成本最終也是由下游承擔。事實上，這種安排對中小形零售商更不公道。

我非常敬重林偉駿老闆的創業精神。不過，只要林老闆試過從外面拿一兩個香港人不認識的品牌來代理，自然明白太古做法箇中原由。最後，我在此謹祝林老闆生意興隆，畢竟一年之間擴充40家門市，要撐下去一點也不容易呢！

利世民
www.facebook.com/AppleSimon