信報 (專家之言 B13, 2011.12.21)

呢排，我哋獅子山學會又有一批新嘅intern。佢哋都係來自南半球，因為佢哋聖誕當暑假咁放，所以有一批相信自由嘅後生女，因為聽咗佛利民話，要睇自由市場嘅偉大，就要來香港，就來咗我哋獅子山學會。

咁尋日，佢哋上我教嘅堂時，其中一個就問關於鬧到滿城風雨嘅電力加價事件。咁我就問番呢位intern，知唔知點解電力公司要求佢哋提出嘅加價幅度，憑乜有呢個百分比。

咁呢位百分百澳洲白種女intern就話： 「減排同燃料價格上升，所以申請加價。」咁我就答佢： 「全世界都係咁啦，有政府例如我哋祖國咁，見電廠有啲咁嘅壓力，都係唔畀加，點解我哋特區啲電公司又咁把炮要政府畀佢哋加呢？」呢位intern，對我哋區情原來唔係完全唔識，就話係因為有一個政策叫「利潤管制計劃」。作為導師，我一聽到佢咁講，就即刻糾正佢話： 「千祈唔好中埋呢政治化妝術，一定要叫呢個政策為『利潤保證計劃』。」我講完就接住問： 「咁點解當初會有個利潤保證計劃呢？」去到呢度，我相信如果對住民主派議員、敢佔領中環但唔敢講英文嘅廢青【註】、專搞蛇宴左派「工會」問同一條問題，佢都會話係因為香港有一股根深蒂固、明益大商家政策文化。各位，right？當我堂上提出呢個論調時，個intern 就問答： 「冇理由咁簡單。」

利潤保證下西隧狂蝕

我笑一笑，就同佢講，其實除咗電力之外， 「利潤保證計劃」呢個概念，都喺其他範疇上用。因為我哋辦公室有個位望到西隧，我就指向西隧方向話：「嗰條隧道都係有『利潤保證計劃』，不過年年蝕到個投資者飛起，所以肯定唔係明益大商家。」跟住我就由鴉片戰爭講起，簡短咁講咗次殖民地歷史。而重點就係五十、六十、七十年代，人口大幅增加時，殖民地政府因為知道需求不斷上升，不過因為政局不穩、遍地「菠蘿」，好似起發電站呢啲要好多年先回本嘅投資，難吸引資金。最有效吸引資金嘅方法，就係喺需求不斷上升嘅情況下，保證資金投資賺硬。

有投資，電力供應就會多。

不過，呢個利益保證制度仲有冇需要呢？睇過海交通，西隧年年蝕到飛起，蝕到再冇私人公司肯再起道路基建，政府之後唔為交通，而為就業，搞十大工程，就完全唔理成本效益（都唔講環境破壞）就上馬。即係特區交通問題，係咪根本唔關起新路事？

睇番電力，大家要問一問自己，現有嘅投資係咪已經夠呢？現有保護資本一定賺政策，其實仲係非常鼓勵投資。我估，中電恨不得起嗰段十億美元計嘅液化天然氣輸入站，而港燈就想起海上風車，由南丫島起到海南島，之後谷大資本開支後，乘一乘個回報率，跟住加價。

問題係，呢個就係利潤保證計劃想見到嘅結果， 即係利潤保證計劃係work嘅！要鬧，就鬧點解仲要鼓勵投資。啲電力公司唔蠢，所以要加價，就搵個理由，最好嘅理由就肯定係環保。

點知有啲電力公司又唔夠醒目，走去諗住搵啲本地「環保」團體護航，完全被佢哋綠色嘅皮呃咗。

「環保」團體不環保

本地「環保」團體，其實係西瓜，話就話係為環保，不過只係不折不扣想玩馬克思主義，仇富行動。所以你會見到佢去濕地反對起豪宅，不過當有大好機會（即加電費）去減低特區碳排放時，就反對電力公司加價；仲話要住宅同中小企有優惠，即係要佢哋用多啲電。

所以，我奉勸所有有心人，唔好再捐錢畀呢啲本地「環保」團體，學校唔好再同佢哋合作，因為除非佢哋老實咁話佢哋其實唔係搞環保，而係搞共產，佢哋呃緊你哋咋。

註：bit.ly/tHHNsB

獅子山學會研究部總監孫柏文

info@lionrockinstitute.org