爽報 (財經V27, 2012.1.31)

昨日，《蘋果日報》財經報道關於iBond嘅統計：如果用午餐肉零售價計，iBond回報跑輸大市「成條街」？


點講都好，我都要向蘋果同僚致最高敬意。因絕大多數傳媒都混淆通脹同消費物價指數（CPI）。蘋果呢次識得用午餐肉做Benchmark，毫無疑問係突破填鴨式教育洗腦嘅第一步。

統計究竟點樣計呢？蘋果同僚用iBond一年淨回報加本金，即係10304元計，舊年同期可買到幾多罐午餐肉，今年可買到幾多罐午餐肉，相差就係「跑輸」通脹指標。

睇咗有關計算嘅報道好多次，都有同樣疑問：係咪應用基數10000元計舊年買到幾多罐午餐肉，再減去今日用10340元買到幾多罐午餐肉，然後先計到iBond跑輸通脹幾多？如用此計法，iBond雖然跑輸通脹，但未至於成條街咁悲情。

另一個問題係：午餐肉係咪通脹最佳Benchmark？其實蘋果同僚話用豆豉鯪魚做Benchmark，iBond輸得更勁。但用白米去計，其實又唔算跑輸喎！舊年升2.28%，iBond派3.04%，點計都有賺喎。

派彩未算失禮

講到呢度，代表填鴨式教育嘅精英知識份子就會走出嚟，好大聲咁講：「用番CPI咪好囉！

唉呀！用一件貨物會有取樣偏差，但唔代表用一籃子貨物就好好多。一籃子入面究竟有乜，各樣貨物比重多少，一樣可畀統計者做數。事實上全世界嘅一籃子貨物都做數做到飛起。究竟嗰班精英知識份子，幾時先肯睇吓真實世界？

人類幾千年文明傳統，貨幣就係黃金、銀及銅。紙幣現象只係1973年後先有，歷時只有40年左右。如要有一個CPI以外嘅Benchmark，我認為應用黃金同白銀。至於銅，自進入現代文明，已漸失貨幣地位，可以撇出。

如用黃金白銀各佔50/50比率計，iBond派彩唔算失禮。舊年7月底，現貨黃金大約每盎斯1630美元，白銀就約每盎斯40美元；10000元可買到0.39盎斯黃金再加16盎斯白銀。今日，用10340元，就可得到0.38盎斯黃金同19.8盎斯白銀。

據說今年財政預算案會再推iBond，政府分明益街坊。至於抽唔抽，大家自己諗啦！

利世文

專欄電郵：SharpHK.Simon＠gmail.comFacebook

專頁：www.facebook.com/AppleSimon