爽報 (財經, 2012.2.6)

上星期，同一班中港生意朋友吹水，聽唔少有趣觀點。「班高登仔成日淨係識得話大陸人啲錢係黑錢，邊有咁多黑錢呀？佢哋根本唔知，過去幾年好多大陸人，因為地產商收地，屋企本來唔值錢嘅爛地，竟然都幾百萬賣出。又有人更加換咗層樓返來，再炒多一轉。就係咁，幾年間多咗好多百萬富翁，甚至千萬富翁。咁短時間搵咁多錢，梗會大使少少；香港名店，咪就係靠呢班人支撐。」Andy係生意人，但又會留意吓香港網上文化，呢個組合，都算異數。

不過，我更有興趣從貨幣理論去諗，收地發財其實代表乜現象。

過去幾季價跌只是序幕

大陸人當磚頭係銀行存摺簿，惟自從08年，地產泡沫越來越過份。當然啦，背後梗係人民銀行加四萬億發功。另一邊廂，當人民幣越來越唔見使，對磚頭需求自然越大，呢個循環，就係大陸新暴富現象嘅成因。

資產泡沫，由地產到股票，股票到地產。07年，玩殘股票後，跟手就到玩地產。地產泡沫一路醞釀，但股市泡沫爆破後，基本通脹結構問題不變，所有資產價格上升壓力，都湧晒去一個範疇：地產。
資產泡沫唔可能永無止境炒上，製造泡沫，除要有大好友嘅信念加資金，亦一樣要有基本素材：起樓要地，股票要盈利。泡沫爆破前，基本素材越來越短缺，最終一樣要爆。

越來越多因為徵地發生嘅糾紛，其實係一個訊號，呢個泡沫開始出現問題。徵地同收地，一個係老屈，一個係買。究竟係乜嘢因素令老早就已經不務正業嘅地方，政府使橫手呢？資金緊張？地產發展商已經無能力大手筆畀錢？好直線咁諗：「供應越短缺，仲唔再炒上？」

資產泡沫特點係以財富效應製造更多財富效應，供應短缺，即刻代表製造新財富嘅運作一邊開始斷纜，當然總有個別異數繼續夾上。不過，細心觀察就應該可以搵到好多泡沫嘅裂痕。即係話，過去幾季大陸地產價錢跌只不過係序幕；泡沫爆破，從來都唔會無聲無色。

利世民
專欄電郵：SharpHK.Simon＠gmail.com
Facebook專頁：www.facebook.com/AppleSimon