爽報 (財經V29, 2012.2.22)

「何俊仁已經入閘，唐英年又已經入閘。如果梁振英夠簽名提名，點解仲未入閘？」呢幾日，花邊新聞夠八卦，不過，經濟人職業病發作，就係鍾意諗吓啲細位。

撇除好多一個提名簽名都無可能攞到嘅二打六，表示有興趣，但未入閘嘅，除咗梁振英，仲有曾鈺成同葉劉淑儀。如果大家仲記得選委委選，梁營輸到七個一皮。當時已經有人講，梁營除非得到民建聯同工聯會分票，佢好可能連閘都入唔到。

曾鈺成話要下星期先慢慢諗，變相鎖死咗一大班簽名，高章！

「不過，仲有好多游離份子喎！」你可能會問。

咁就要讚吓葉劉淑儀。試諗吓，如果到今日都仲係游離票；唔係民主派，不挺梁，不撐唐，更加唔係民建聯同工聯會系統，即係話呢班選委得一個身份：政治投機者。

政治投機者，得一個目的，就係落注，買贏。

「CY？你話阿爺會唔會畀一個破壞遊戲規矩嘅人做特首？」假如我係葉劉淑儀，參選，根本唔需要政綱，最緊要係曉以大義。「唐英年，真係畀佢做到特首，我驚佢做唔長喎。唔通畀鐵頭做咩？呢次係一個可以有競爭嘅選舉嘛！」

呢個禮拜，葉劉淑儀究竟可以吸到幾多政治投機者嘅簽名？如果葉劉淑儀成功入閘，佢又可唔可以搶走CY個「有競爭選舉」嘅劇本呢？

利益申報，我個人認為何俊仁做特首最有利推行積極不干預政策，因為到時連牛頭角順嫂都會諗：「政府都係唔好亂來。」

資金仍緊　勢要減息

講開抽乾水，上星期六人民銀行宣佈減存款準備金（RRR），我就去查吓過去一個月上海銀行同業拆息（SHIBOR）。大家心水清，都記得1月中隔夜息曾經一度抽高到8厘以上，更出現短息高過長息嘅倒掛現象。其實由1月初開始，人民銀行已停售央票，以免抽乾水，之後更用正回購注入流動性。

不過，資金情況似乎仍然緊張。人行宣佈減RRR之前，隔夜息已經升咗7日。如果情況無改善，恐怕不但要減RRR，就連利息都要減。但係，通脹又點算呢？微觀調控？

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon