爽報 (財經V29, 2012.2.28)

好多人問我，美國目前經濟點樣？復蘇未？樓市幾時反彈？我唔直接答，畀幾個例子大家自己參透。

喺美國一個投資討論區，我搵到篇七年前嘅貼文：「上星期，我用咗8個鐘頭去遊走拉斯維加斯市郊……嗰區嘅新屋，大概得一成入住；間間都起得鬼咁肉酸。搵咗好耐，我先至見到一個新搬入伙嘅中年男人，我同佢講，我對呢一區地產有興趣。呢位仁兄足足同我講咗成十分鐘，話炒家點樣炒起晒啲價錢……原來佢買咗兩間，?家諗緊邊間放盤，邊間自住。佢仲話之前小回大漲，係利好因素，佢覺得呢區樓市有升無跌。」

買磚頭保值成常識

貼文嘅日期，係2005年1月2日。之後發生乜事，相信唔需要我多介紹。

好多人以為美國樓市07年至到頂，其實部份炒得好勁嘅地區，06年底已經見頂，07年已經回落，08年先至發生骨牌效應。

如果大家有睇過Charles Kindleberger本Manias, Panics and Crashes（中譯：《瘋狂、恐慌與崩潰》）就知道由泡沫見頂到恐慌拋售，期間有個叫受壓（Distress）嘅階段。有時泡沫可以維持受壓一年半載。呢一年半載，偏偏又係賺大錢同蝕大錢嘅時機。

走得甩，摩頂當然開心。走唔甩，做樓蟹，最大心理壓力，係要每個月要繼續供；唔似股票咁，可以放埋一邊當無買過。

睇淡樓市，老實講，真係要些少勇氣。畢竟，太多人將全副積蓄押注樓市。傳統上，無論中國人美國人，都覺得最緊要有瓦遮頭。

而且，過去四十幾年，通脹係常態，買樓長線保值已經成為常識。所以好多人都覺得，叫人買樓總好過叫人睇定啲。

上車並非一勞永逸

我亦要承認，對未來作出任何預測，總有出錯可能。更加無人可以講得實，未來嘅何年何月何日，價錢會升幾多跌幾多。重申一次，我只係想同啲以為上咗車就可以一勞永逸嘅小朋友講：買樓賺咗錢嘅人，其實都冒咗風險。

講番美國樓市；美國其實係一個好大嘅國家。當年泡沫，有啲地方，好似拉斯維加斯市郊，根本無條件發展地產。

如今，嗰啲區域繼續係重災區，處處爛尾樓。傳統東岸大城市，過去十年有人口增長嘅地區，樓價舊年就回到05年水平。呢個故事教訓我哋，泡沫市買樓，都寧願買已經成熟嘅區，新區新盤，留畀新手。

利世民

專欄電郵：SharpHK.Simon＠gmail.com　
Facebook專頁：www.facebook.com/AppleSimon