爽報 (財經V32, 2012.3.14)

美國NPR報道：「佛羅里達州一名14歲少女Willow Tufano，最近以12000美元，買下一間在高峯時值10萬美元的一間銀主屋。」

邊到有錢買層樓？原來，Willow阿媽係地產經紀。過去幾年，樓市爆破加經濟差，Willow幫好多人放售銀主屋，跟住阿媽手上嘅銀主屋清單去睇屋，點知發現好多銀主屋，入面有電器傢私。佢就同銀主屋買家傾，幫佢哋清咗屋入面嘅雜物，然後將有價值嘅上網拍賣。Willow大概一個月賺到500美元，最近佢儲夠錢買第一間屋；仲打算將間屋放租，再儲錢買第二間。

回想起02、03年，我第一次做業主，一樣係有屋無人買。當時，無人會覺得樓價會升。原因？有一千幾百萬個。不過到今時今日已無人記得，樓價唔係只升不跌。樓價一路升，人就會產生預期。呢個心理源於人類一個非常深層次心理運作：用力掟波，然後默想個波嘅軌迹，直到打中目標。可以話，軌迹觀係正常求生意志一部份，故有人會廢寢忘食咁玩AngryBird，亦對價格走勢如癡如醉。

不過市場運作，唔係好似古典物理學咁有規律。市場每刻都有新事情發生，成千上萬，甚至過億人，就一齊擲骰仔，決定自己想點做。每一剎那都幾乎係獨立事件。市場上每刻都有人做錯決定，不過呢個negativefeedback係好事，可汰弱留強，令世界不斷進步。

現代財經世界入面，偏偏又有槓桿呢回事。當個資產價格升，信貸擴張，令到資產價格再升。呢個規則之下，加上軌迹觀嘅心理作用，投機，講到尾都係接火棒遊戲。太陽之下無新事，其實好多人都知道音樂有完嘅一日，只不過大家都信自己可以走得甩。

利也民

專欄電郵：SharpHK.Simon＠gmail.com
Facebook專頁：www.facebook.com/AppleSimon