爽報 (財經V37, 2012.3.06)

噚日朝早，一起身就聽溫家寶宣讀政府工作報告。當然，人大會議，點都唔會有人掟蕉舉牌博上鏡，娛樂性點都差少少。其實，工作報告嘅內容，好多一早已經係公開嘅資料；例如今年人民幣廣義貨幣增長，目標係14%左右，上個月央行已經講過。

暫時，大家反應比較大，係溫家寶將GDP增長目標定到8%以下。好多人，對呢個講法有好多解讀。有人話，呢個係中國經濟增長，預期有所放緩；7.5%只不過係所謂嘅預期管理，如果最終數字超過呢個下限，就當係超額完成，無乜大不了。

又有人認為，呢個係北京希望減低經濟增長，從而減少通脹壓力。唉，時至今日如果仍然有人相信，經濟增長嘅必然結果係通脹。我只會話，經濟學嘅普及教育仍然未做得好，要繼續努力。

希望大家唔好嫌我囉唆：「通脹永遠都係貨幣現象」。當太多貨幣追逐太少貨物，物價自然會上升。好多人，甚至乎大行分析員，都搞錯晒，話經濟增長刺激通脹，呢個講法，係本末倒置。然則，將廣義貨幣增長同GDP增長相提並論，當中邏輯又應該點樣去理解呢？

我哋要明白，過去近四十年，全世界都生活於一個政府可以無限制發行貨幣嘅世界；廿世紀之前，人類歷史未試過一次，可以任由政府無限制發行貨幣，但又唔引發經濟災難。

過去二十幾年，好多經濟大國，例如美國、德國同日本，都曾經成功將物價升幅控制。更加準確咁講，應該話八、九十年代，世界三大經濟強國，都成功將通脹同通脹預期保持一定水平，令到人民唔會感到追唔上。事實上，如果從客觀數據睇，呢幾個強國嘅貨幣購買力，其實不斷被削弱。只不過，呢幾個國家嘅國民，因為可以從新興經濟輸入便宜貨物，所以表面上經濟強國嘅國民，生活水平仍然可以持續上升。

另一邊廂，新興經濟成為信貸擴張嘅投機熱點，結果，貨幣同信貸膨脹，令到新興經濟接連出現資產價格泡沫。呢個假象之下，令到好多人都以為，通脹、泡沫同增長係同一件事嘅三個面向。

如果從之前嘅經驗睇嚟，中國已經去到一個地步，要容許資金投資境外，容許外國產品滿足不斷膨脹嘅購買力。溫家寶話要幫企業走出去，宏觀經濟上絕對正確。至於有乜投機概念，明日續談。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon