爽報 (財經V38, 2012.3.15)

疑似梁營啦啦隊成員劉夢熊話：「萬一流選，天不會塌下來，但若是這樣，我實在對那有缺陷的機制那種忍耐到了臨界點……我會立即向中央建議，5月6日的重選，應該一人一票普選特首！」好多人，覺得夢熊吹大咗。又有人話：「夢熊大師，我，等，你！」

大家唔好諗多咗，ok？認真便輸呢個道理，唔通你哋仲唔明？夢熊大師呢番話，唔係同廣大市民講，而係同個1194名選委講㗎！

夢熊大師話：「對那有缺陷的機制那種忍耐到了臨界點」，其實佢只不過重覆緊梁營不斷洗腦式嘅宣傳，即係話：「梁振英民望咁高，都要畀你班既得利益逼到無得玩，我好嬲呀！」

至於籤文下半部：「我會立即向中央建議，5月6日重選，應一人一票普選特首！」其實，夢熊大師嘅潛台詞：「你哋小心啲。如果梁振英贏唔到，我就會同我中央嘅後台講，香港有人搞局，反啦，反啦！」

高人提點：「藍營在野日子，台灣有個邱毅，專爆對家黑材料，然後用九牛二虎之力抽水。陳水扁一家，就係畀佢做低。你估佢啲料邊到收？藍營執政，情治機關要做在野黨，大把方法。不過當藍營在野，就要有個人負責呢種粗重工夫，用傳媒打對家。」

夢熊大師，會唔會係港版邱毅呢？香港有情治機構，中環一個，西環又一個。有無人諗過，咁多年前一張施工圖則，點爆出來呢？當年EDC都話拎部電腦去整，先搞到全城閃卡；唐英年私人電郵，點解會畀外人攞到？過去幾個月，香港越來越多爆料，而且內容都非一般難度。如你信有好心讀者報料，可能你太睇得起香港讀者。不過到最後，將中環同西環嘅矛盾表面化，未嘗唔係一件好事。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon