爽報 (財經V41, 2012.3.16)

官樣文章，從來都好難睇。官僚刻意將文章寫得難明，模稜兩可，自然有原因。一來，人人都知道，說話講得盡，就無得返轉頭；二來，當事情解唔明，而佢哋又掌握解畫嘅權力，好多人自然當佢哋神咁拜，好想從佢哋口中再套多一兩句公開嘅秘密。

話雖如此，世界仍有好多人對解讀官樣文章樂此不疲。正確啲講，解讀官樣就經已係一個行業。無錯，我都係行業一份子。如果你問我想唔想官員坦白少少，我會寧願佢哋唔講嘢。

講番官樣文章，最近有兩份，市場反應大大不相同。溫總交代完政府工作報告，有人覺得係好消息，因為乜嘢增長重質不重量；當然，亦有人簡單啲，覺得溫總講法唔需要諗多咗。講到尾，經濟增長放緩、出口放緩、入口價格急升，就係咁簡單。

太平洋彼岸，每日都有重要消息公佈，搞到消息唔再有價值。星期二聯儲局議息，會後聲明又係一篇思覺失調嘅大雜燴。點解思覺失調？皆因今時今日嘅聯儲局，伯南克唔夠強勢，議息聲明，要包容各位理事觀點，惟有乜都寫。所以一邊廂話有通脹壓力，另一邊廂又留一手，話準備隨時做嘢。

客觀數字唔會呃人。油價急升，你可以話係中東地緣政治嘅結果，唔會構成長期通脹。不過70年代石油危機，中東佬只搞咗一陣，但通脹可維持好長，直到當年沃爾克（Volcker）將實際利率抽到民不聊生咁高，先至雨過天青。

究竟通脹預期令油價升？定係油價升令通脹預期升？我諗聯儲局班大袋心中有數。所以其議息會後聲明，大家要留意「凡事反對派」JefferyLacker嘅反對原因：2014年先終結零息政策，恐怕太遲。事實上，聯儲局FOMC嘅反對票，大家唔好以為個位理事真係反對。聯儲局嘅政治生態，呢一票反對，其實係留番畀班大袋日後可以有路轉身嘅活門。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon