蘋果日報 (財經要聞B11, 2012.3.20)

記得六年前孫柏文入行做財演，嗰陣時有隻長升嘅富士康（2038）。喺05年上市幾蚊，06年升到差唔多30蚊。升勢咁勁，除數靚外仲因當時富士康代表世界商業秩序未來，即外國設計、中國人代工。

一場金融海嘯，令所有股價被打殘，富士康亦冇倖免，不過唔同其他公司，佢返唔到以前嘅勢頭。其中一個好大嘅原因，係因為好多外國或特區嘅「衞道之士」，係咁話佢「剝削」啲工人，所以令佢哋要使好多不必要嘅錢。

例如，雖然富士康員工自殺率比美國任何一個州都低，過百萬員工中有一人自殺，就被人評為「迫死員工」。搞到要喺大廈牆邊裝防跳網，又要請心理輔導，更要搞啲我相信員工參與時輕則笑公司戇居，重則謾罵嘅「增士氣」活動。最弊係搞晒後，個幾月前，有個喺美國全國公共廣播電台NPR（政府出錢，似BBC同RTHK）播放，有位叫Mike Daisey製作嘅報道，話幫蘋果做代工嘅富士康仲係虐待啲員工。

點知喺上個禮拜，NPR忽然罕有咁收回全集報道，仲公開道歉話報道嚴重違反記者操守。被踢爆嘅Mike Daisey被逼承認，佢嗰集係「節目」而唔係「報道」。咁呢個Mike Daisey靠邊個啲料去造節目？就係我哋香港好出名，「衛道之士」上身嘅一群記者至喜愛嘅「大學師生監察無良企業行動」SACOM。

最黑暗時期已過

以前，睇我哋啲報紙報道SACOM嘅哭訴，同直接將SACOM新聞稿當新聞冇分別。好彩講到記者操守，我哋仲有外國傳媒把關，如果唔係富士康上上下下繼續要被屈。富士康應該可以返正途，唔使白使錢，再度可以工人嘅生產力出糧。雖然唔知可否返回之前之勢，不過，SACOM呢啲毒瘤已被切除，富士康已過最黑暗之時。

孫柏文

獨立股評人