爽報 (財經V38, 2012.3.27)

噚日，陽光普照，大家如常生活。不過好多人明白，遊戲規則已改變緊。究竟變乜？好多「梁粉」起初都覺得，呢個人都幾有心，又有台型，值得支持。又有人覺得，呢隻狼夠吉士挑戰既得利益，應該力撐。但全部人都無諗到，去到最後，竟然搞到有你無我。

香港商界，不嬲都係有競爭，無敵人，見面握手，放假打波。我收到風，有低調梁粉，本來都唔介意加入新政府班底。但係?家搞到咁，佢哋都好擔心，一旦加入新政府班子，會即刻少咗好多中環友好。

有冇咁嚴重呀？不如大家又諗吓，究竟點解有285人，明知輸，都要投票畀唐英年？「你睇吓唐英年，佢究竟做錯咗啲乜？佢唔聽話咩？如果一早無心畀佢做特首，好心就唔好叫佢去選。如果大家都係可以接受嘅人選，就無謂去到咁盡。我都信，梁振英未必掌握所有事嘅發展，不過，咁仲得人驚。究竟家陣邊個話事？畀我哋得個『知』字，至少可以自己睇緊少少，唔好捉錯路。但?家我哋根本唔知，究竟邊個人諗緊乜，你叫我哋可以點樣？」一個中環友嘅心聲。

呢位中環友，未必係嗰285個選委其中之一，不過，佢嘅憂慮，應該都係嗰班選委嘅憂慮。講到尾，大家都知道，今次係西環操盤，想佔領中環。西環嘅特點，就係唔信外人。但係點先算係自己人呢？中環價值，信任建基於大家要互相依賴。呢一代嘅西環價值，信任就建基於大家控制幾多對方嘅材料。材料未必係醜聞，但係一定要可以令人貼貼服服，聽聽話話。

呢套遊戲規則，要加入政府，你可以唔做「自己人」咩？「梁振英無錯係香港市長，而呢位市長一定係『自己人』。佢係唔係同時係市長兼市委書記呢？市委書記有人事決定權。如市委書記另有其人，咁可能新政府要向更高一層嘅問責。」高人提點，任何人加入新政府團隊等於向西環交心，試問一個只係想搵錢飲茶灌水嘅中環友，你想唔想同一個隨時套你料嘅人做朋友？

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon