爽報 (財經V53, 2012.4.18)

阿根廷政府唔該都冇聲，就話要國有化屬西班牙公司嘅石油天然氣公司YPF。總統CristinaKirchner話，會有個公平公正嘅估價機制。不過你信唔信？YPF最大股東持有近57.43%嘅西班牙公司Repsol，話要告到天腳底都要告。人哋主場，作客可惡得出樣咩？

YPF同Repsol前身係國企。畢竟能源行業上世紀冷戰結束前，係好多國家嘅策略性資產。不過自80年代尾，原材料大熊市，地球首次有和平希望，好多國家不但進行自由市場改革，更將策略性資產民營化。Repsol由上世紀89年到97年逐被私有化。YPF私有化過程就係91到99年。99年，Repsol從阿根廷買落最後嘅5%股權，兩間公司合併成RepsolYPF。

呢個總統有鋪大政府癮，之前佢試過將私人退休基金同航空公司收歸國有，但似乎阿根廷民眾好受落。今次佢指YPF將天然資源出口，令到阿根廷人民要付出大筆外滙，所以不如收歸國有，造福百姓，睇嚟都幫佢贏到唔少支持。

十年前阿根廷經歷完破壞性嘅經濟災難，當時阿根廷披索放棄兌美元而貶值。好多欠落外債嘅企業幾乎即時破產，亦令物價急升。不過，貶值加削債好有效，03年後阿根廷經濟重拾升軌，就業同GDP好快回氣。05年阿根廷政府就宣佈還錢畀IMF。不過私人投資者仍要硬食削債，故國際資本市場唔係好信呢個國家。

90年代阿根廷經濟改革，無同時減政府開支，無論點都搞唔通，到今日都佔政府開支3成幾。94年試過民營化，結果政府收入少咗。之後02年由國家揹起，條數又太大。種金就係種金，係咪政府直接負責，數學上一定唔可行。

今日阿根廷令我諗到未來嘅歐洲，兩者太多相同之處；只不過，歐洲危機嘅規模同震盪，將大過阿根廷好多。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon