爽報 (財經V55, 2012.4.23)

上星期六讀書會，有句說話，真係唔分享唔得：「一百個人同時用同一個價錢，買一隻股票，但係結果可以有人賺有人蝕。我哋好難從一個行動，就睇得出最後嘅結果。」呢位朋友嘅講法，我認為，真係好正。

有乜咁特別？試下諗，每一日都有好多資訊，叫人買買賣賣。假如，你信咗其中一個貼士，入貨，但係之後又點算呢？等？等到幾時？
目標價？先唔講所謂嘅目標價有乜嘢意義。其實隨時間流逝，世界有新發展，事件嘅本質亦會因此發生轉變，就算之前嘅目標價有幾準都好，可能都有需要重新調整。

再者，點解要有目標價呢？如果一隻股票應該值100蚊，點解?家只有80蚊？要知道，呢個世界，條街有錢，就有人去執。20蚊折讓，當中代表：（1）開目標價嘅分析員唔知自己講緊乜；（2）佢認為未來會有新發展，令到呢間公司嘅股價值得再升多20蚊。

從呢一個角度，我哋就可以好簡單咁將所謂嘅股評分成兩類：（1）消息當分析；（2）分析當真理。

之前我話有啲分析員唔知自己講緊乜，但係佢哋又要交功課，所以就「消息當分析」，周圍收風睇下有冇人「做嘢」，配合下，自己就扮下先知，甚至玩埋一份。至於「分析當真理」嘅分析員，就將好多未發生，可能發生，亦可能唔會發生嘅事，當做一定會發生。

最抵死係，根據我嘅非正式觀察，兩類分析員嘅命中率，基本上無乜分別。我唔係笑分析員估錯。事實上，我深信無人可以預測未來，所以，估錯正常不過。我自己，滿足於做事後孔明。大家有所不知，做事後孔明，其實，一的都唔易。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon