爽報 (財經V48, 2012.5.17)

我對投資嘅定義非常嚴格：「投入嘅資本，一定要令到創造價格嘅能力提高。」

換句話講，買一樣嘢返來，等價錢升，唔係投資，係投機，因為你無令到件事「創造價格嘅能力提高」。投機賺錢，因為你估中（好彩），又或者承受一定風險（都係好彩）。買樓收租，算唔算投資？如果你執靚間屋，畀心機揀租客，落力同租客傾租，各種投入令回報更高，呢個過程就算投資。

買股票係唔係投機呢？老實講，如果以為買股票等於同誠哥、郭氏或者四叔夾份做生意，呢個諗法係唔係有啲天真呢？你試下股東會去同誠哥班人傾生意，睇下佢哋點答你？

如果抗拒「買股等於投機」呢個諗法，我建議你將買股票視為「借錢畀上市公司做生意」。資本市場入面，撇除稅制以及其他各種交易成本等因素，原則上企業嘅融資方法，對企業嘅價值係無影響。即係話，對上市公司老闆來講，股民散戶只不過係資金來源，同銀行一樣。借錢畀人，應該問嘅係：一，信用好唔好？未來繼續保持同一個信用水平嘅機會有幾高？其二是有乜冬瓜豆腐，間公司有幾多實質資產做揸拿？其三是有冇派息？

股價升跌，屬於投機問題，要用另一套思維去諗，聽日繼續講。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon