蘋果日報 (財經要聞B09, 2012.5.22)

上個禮拜接二連三既壞消息，到左上周末已到達一個大家慣左既地步。孫柏文已經好耐未見過尋日個市況，即全日埋單時只係郁左29點，仲要全日波幅都係好細。

G8開會話佢地撐希臘留係歐元區，市場唔郁係因為聽到後問：「唔通可以話唔撐咩？睇吓下一步棋點算把啦。」其實如果之前個轉08年金融海嘯，令大家成為次按債券專家，我相信今次歐債亦令大家成為歐洲、特別係歐國之間關係既大師。到呢刻，大家知既野同一般係華爾街返工既Banker差唔多。

上周末時有另一個冇乜報道既新發展，我覺得大家要留意︰法國第二大地產發展商旗下既財務公司發左債，債價係近呢幾個禮拜開始插，個勢似07年中評AAA同AA既次按。呢間財仔，就係為呢個發展商賣樓時，為買家提供貸款。

法國傳媒直情叫呢間野做法版Northern Rock（北石），呢個名係咪似曾相識呢？當年北石爆完，英國樓市爆，今次會唔會係法國樓市發生？法國樓市係07年前冇狂升，08年輕跌，不過之後因低息所以開始穩步上揚。黑天鵝作者話齋，之前越穩定既趨勢，一爆就大煲，法國樓市之前咁穩定，一旦跌，全行出事。

點先嫁到朱克伯格

最驚係，當法國D銀行，因為手上既歐豬債已令市場開始驚佢地唔夠資本，法樓市爆會唔會令佢地被一沉百踩咁資不抵債？大家留意。最後要講PriscillaChan。相信好多港女想學佢，搵個有錢，Sorry I mean有才華嘅丈夫。佢同朱克伯格係Frat派對等廁所時識，我當年係花旗國讀書時，都冇聽過港女去過。點都好，佢地既故事令我為盛女繼M記、Economist、TED後加兩個建議。一、飲多D水等要去廁所，二、去花旗國D好學校既Frat派對。唔知乜叫Frat？睇吓《AnimalHouse》啦。

孫柏文

獨立股評人
本欄逢周二、四刊出