蘋果日報 (財經要聞B11, 2012.5.31)

前日，睇住阿爺出手，股市就大彈。依家市場真係好多消息，堅定流都未有定案，不過大家都反射式咁炒番轉先。早幾日，同一個Broker朋友傾計，問佢點睇大陸經濟，佢一句：「其實對我來講，大陸已經爆左。」佢有咁既結論，真係唔怪佢，因為連銀行放貸既Quota都傳話用唔晒。

記得舊年呢個時間，大陸超乾塘，個個係大陸有錢既都走咗去做大耳窿，今年就錢多到借唔晒，可能真係冇借錢既需求。再諗深一層，可能大陸既銀行驚有呆壞賬，所以行事都會小心D。

歐債要斷尾歐元會喪跌

對於改革開放，銀行業其實去到08年，係越來越專業，風險管理主導。點知一場金融海嘯，幾萬億元既貸款，就令多年來辛辛苦苦既改革大幅倒退，埋下壞賬又唔知會有幾多。

最弊係當銀行唔理風險管理咁借，衍生出來既問題就會係邊個先借到，亦即係邊個夠牙力，就邊個借到。係咁既情況下，就會爆出好多貪污問題，長遠而言，只會削弱金融系統穩健程度，最後連國家本身既穩定都會有打擊。

講到壞賬，就不能不提西班牙間Bankia。呢間銀行其實係之前西班牙D本地銀行，合併原意係為左溝淡D呆壞賬，點知個結果係鐵索連舟，火燒連環船。

最大問題係，西班牙政府話會國有化呢間銀行，即係銀行欠既錢，條數由政府孭。不過當西班牙本身都冇錢，自己借錢成本不斷上升，呢個國有化擔保，冇人信。

嗰日，孫柏文同獅子山學會既王弼傾起，究竟個End Game會點，結論就係都係要歐央行印鈔，不過上轉印完之後，好似冇乜用，原因係借錢畀D銀行，根本解決唔到佢地個核心問題。佢地D銀行既問題係資不抵債，而唔係周轉不靈。

所以如果要解決呢個核心問題，歐央行印鈔分分鐘要入股呢D銀行，普通股或優先股，最緊要係可以當筆錢係資本。如果出呢招，歐洲呢場風暴就真係打完，不過歐元就應該跌到七個一皮。

仲有，當歐央行係股東，佢地就要有控制權。王弼直言喺咁嘅情況下，德國就真係話事，歐洲亦會步日本後塵，一衰就衰幾十年。

日棄核電外貿赤字難免

講到日本，佢地決定將所有核電站關閉，係一項好難做既決定。唔夠電都算，因為要用天然氣發電，所以佢地將會面對結構性既外貿赤字。一路以來，大家點睇淡日本，都仲有外貿盈餘頂住，一但冇咗，就連最尾呢條柱都冇埋。仲有，日本人既儲蓄率非常低，到時候如果再冇人接貨買佢地D國債，咁就真係Game Over。

債，如果借得多時，加埋日積月纍，要爆，其實可以好快。全球現吹減債潮，情況同香港係97年之後一樣，不過當全球都減債，金融業會好難撈。我成日同D後生講，喺花旗國1929年信貸額見頂之後，要好幾十年先搞番旺個市。債券Trader直情要夜晚喺油站兼職先維持到生計，希望依家入行嘅後生仔女，冇入錯行啦。

孫柏文

作者為獨立股評人
本欄逢周二、四刊出