爽報 (財經V55, 2012.6.1)

噚日，世民隔空同老友Steven吹水，講到置業：「首次置業比喻做『上車』實在害人不淺，因為造成『蘇州過後冇艇搭』的錯覺……正如你所講，買樓按揭動輒二、三十年，有人要『上車』，但冇人講『上錯車』，或者中途要『落車』又點算？究竟『上車』一語從何而來，幾時會被指正？」

好多人話：「全世界央行都印銀紙，揸磚頭點會輸？唔『上車』，要自己行餐飽，諗吓都覺得慘！」貨幣寬鬆政策，唔代表一定令磚頭升值。曾經差少少就成為世界第一嘅日本，寬鬆咗好多年，樓市就衰足咁多年。再者，央行印銀紙結果帶來通脹，通脹一定令長息升，長息升樓按一定唔會平，樓按貴就一定會蠶食磚頭回報。好多人話：「聯儲局講明唔加息喎！」事實上，聯儲局只有能力控制短息。雖然自從2011年9月，聯儲局透過扭曲操作試圖壓低長息，但美元長債價格上升，更主要因素係歐元區危機逼過嚟嘅避險資金。扭曲操作今個月就完，之後會點，冇人知。歐元區危機會點發展，又冇人知。最重要係香港樓市極受美元兌其他貨幣嘅相對強弱影響。美元越強，港元資產就越受壓。歐元跌，美元就相對升。總之，唔好以為次次印紙嘅結果都一樣。

利世民

專欄電郵：SharpHK.Simon＠gmail.com

Facebook專頁：www.facebook.com/AppleSimon