蘋果日報 (財經要聞B09, 2012.6.12)

 

以前D人成日笑話曾特首also known as曾爵士，會學足佢當年跪係度接受頒發爵士銜頭俾佢既英國佬咁，為接手既執政集團埋下地雷。孫柏文真係估唔到，到咗2012年既今日，我信。

大家睇開《金手指》咁多年，都知道我同班係獅子山學會既同志們，極反對我地叫既「政府支配營商法」、即政府叫既「競爭法」。雖然我地講過好多次，話當你賦予D官咁大權力時，又有「高官退休搵真銀」既風氣，呢條法例將會好似外國經驗咁，淪為大財閥打壓新晉或外來競爭者之最有效工具。

立法會內最支持呢條法例既，係由湯家驊帶領、如無意外今年立法會選舉將會大敗（你估得高官退休搵真銀嗎）、最排外既大律師群，佢地將成為最大贏家。而草案最致命既地方，係豁免政府機構。你估到時政府會搞幾多呢D機構出來做生意，為前高官退休後攞天價人工？

係呢D玩法例既零和遊戲裡，有贏家就有輸家，「人民力量」就係睇穿呢條法例會更鞏固財閥、權貴地位，所以先使出拉布戰。

最廢既係班前任及現任自由黨功能組別議員，係人民力量已提供Political cover政治掩護下，都唔識跟勢殺掉呢條草案，都唔知佢哋既無能係咪反映佢地班選民既低能。

 

特首埋下地雷

點都好，曾特首埋下既地雷，就係香港有好多無乜生意既80後律師、大律師，佢地大把時間同仇恨保皇黨，亦知保皇黨既死穴就係本港中資機構提供既奶水。相信有呢條法例後，將會不斷有人「報案」話呢D在港中資機構違規。中資公司出咗名唔識玩香港司法制度（起碼蘇錦樑唔識打），今次佢地將會踩地雷踩到應一應。

唔通你估呢條法例係曾特首臨卸任前先攞出來，真係咁啱得咁橋？

 

孫柏文

作者為獨立股評人
本欄逢周二、四刊出