爽報 (財經V48, 2012.6.14)

呢邊廂，前金管局總裁兼睇住聯滙出世嘅任志剛，寫咗篇學術文章討論聯滙，文章大意：「港紙如要捍衞絕對滙率，要顧及本土經濟環境，又要繼續做國際金融中心，其實好難。故聯滙唔止一招，必要時，根據《基本法》同《外滙基金條例》，其實金管局係想要個世界有幾多港紙，就可以有幾多港紙。」

另一邊廂，候任特首梁振英就話，要用儲備去幫香港人有尊嚴咁生活。冇錯，過去幾年有好多政治演員都叫政府派錢，呢次求仁得仁，香港終於有個特首，計劃用錢用得爽過希臘。

唔通香港真係要歷此一劫？外圍經濟差，美滙似從十年弱勢轉強中，加上候任特首講到明會用晒儲備，恐怕香港今次真係會出現根本嘅轉變。話唔定，當CY敗晒特區儲備，脫鈎呢劑藥，大家都會一、二、三灌落肚。

「脫鈎有乜好驚？」冇錯，大家都覺得希臘會脫歐。不過，唔好唔記得，如果之前唔係希臘政府亂用錢，就唔會有今日。將貨幣貶值，印銀紙，就好似化療，有副作用。香港企業同銀行，有做落美元債或者人民幣債，港元一貶，呢班人全部即時資不抵債。到時又要政府救，政府又冇錢，又印、又貶。如是者，個病永遠都唔會好，要等人打救，香港咪事事要靠北京，好似希臘要睇德國面色囉！

利世民

專欄電郵：SharpHK.Simon@gmail.com
Facebook專頁：www.facebook.com/AppleSimon