爽報 (財經V44, 2012.6.20)

壹傳媒要學對冲基金？冇錯！不過，我唔係叫老總沙膽虹將個300萬倉做槓桿。

噚日，睇完老總篇《沙膽虹手記》，真係有少少掛住以前俾黎老闆智英訓話嘅日子。沙膽虹話，以後要將鋤報會嘅會議記錄放上網，畀全公司一齊睇；有透明度，公司自然一團和氣，萬事順利。

沙膽虹身經百戰，又係黎老闆智英麾下猛將，當然明白箇中道理。但係好多同事，尤其係年紀比較大、心態上比較老嘅一輩可能會覺得，公司開會決定，要由上中下管理層，一級級傳令落去，公司先至有規有矩，亦唔會有誤解。亦有啲鍾意玩弄權術嘅人覺得，呢種對於公司決定嘅控制，係一種權力嘅表現。透明度？唔係佢哋杯茶囉！

我建議沙膽虹向同事介紹對冲基金Bridgewater創辦人Ray Dalio寫嘅一份小冊子：Principles。簡單講，Dalio話做人同搞組織都要理性。理性嘅大前提，就係可以坦然咁面對事實。透明度，就係坦然面對事實嘅表現。所以，倒番轉頭講，冇透明度，就係唔能夠坦然面對事實，就係唔理性。唔理性，就係感情用事，就係人治。

老實講，同事都唔希望公司玩人治，係咪？作為壹傳媒舊生會一員，我希望公司可以突破過去，四面受敵，八面威風。

利世民

專欄電郵：SharpHK.Simon@gmail.com

Facebook專頁：www.facebook.com/AppleSimon