爽報 (財經V31, 2012.6.28)

貨幣寬鬆政策就好似傳染病一樣，只要有一個國家搞貨幣寬鬆，其他有貿易往來嘅國家，好難獨善其身。劣幣驅逐良幣之下，資金流向會漸漸失去平衡。

印銀紙嘅國家，無論點印都好似唔夠用，點都追唔到物價上升。至於緊守貨幣發行紀律嘅國家，就會發覺好多人會攞自己嘅貨幣做儲蓄，貨幣從系統中流走；貨幣供應減少，結果造成通縮。呢種情況下，央行只有兩種選擇：一，跟大隊，一齊印；二，死忍。

1998年，港紙因為美金升值跟着上，港元流失，銀行結餘低到嚇死人。當時，好多人睇死港紙要脫鈎貶值。結果，成立咗啱啱一年嘅特區政府就要做壞規矩，入市買股。班友唔知行咗乜嘢運，特府入市之後幾個星期，俄羅斯債券爆煲，聯儲局為咗救華爾街，突然減息，美元鬆一鬆，香港嘅通縮壓力先至有喘息空間。如果唔係，香港當時已經彈藥盡耗，極度勢危。隨着日元同當時剛成立嘅歐元插水，小陽春之後嘅香港再次進入通縮。

溫故知新，係想提醒大家，美元寬鬆十年有多，其他國家尤其是歐洲、日本，都想重演呢一幕。

到時，我睇吓今日話要港紙升值嘅嗰班人，點樣喊住口要求政府脫鈎貶值。

利世民

專欄電郵：SharpHK.Simon@gmail.com

Facebook專頁：www.facebook.com/AppleSimon