蘋果日報 (財經要聞B09, 2012.7.17)
如果說香港有房屋問題，我認為是聚焦錯誤。但是，的確很多人是這樣看香港。至少，昨天的特首答問大會，也是這樣去定義香港的問題。
這樣說，一定會惹來口誅筆伐：「你知否樓價有多貴，就連劏房也要租幾千元？」我知道，樓價泡沫，是肯定存在。我也不止一次在這裏寫過，資產價格泡沫，是危害社會的事。
港滙弱樓價貴
資產價格泡沫的根源是甚麼？是土地供應嗎？會看數字的朋友，就會見到每年香港的住宅單位落成數目，和樓價的走勢沒有必然關係。反而，不少研究早已指出，樓價和港元滙率強弱，至少有八成關係。
八成，是一個很強的關係。不過，如果我們今天因為樓價貴，就決定要港元升值，他朝，價格跌過了頭，我們又是否要將港元貶值？要明白，聯繫滙率除了七點八，最重要是港元背後的價值保證。
「港元購買力不斷削弱，甚麼價值保證？」如果你會說這句話，證明你的層次高過不少時事評論家。冇錯，港元的購買力確實是跟隨美元在貶。香港人今天的苦，說到底，美國的責任最大。
不過，我始終不贊成將港元掛人民幣。如果看過去人民幣M2的增長，我是找不到理由去相信，人民銀行比聯儲局更會捍衞鈔票的購買力。大陸的通脹問題，一樣嚴重。只不過在資本流動限制下，離岸人民幣供應受制，我們才見到人民幣不尋常地強的怪現象。事實上，迹象顯示，人民幣滙率只升不跌的情況正在轉變中。到最後，全球寬鬆下，港元要保持購買力，真的很難。
利世民
歐洲爆煲，大部份人指摘歐洲人懶過鬼，又貪心，使大個頭，一聽到要緊縮就好似玩閃避球一樣──「齊閃」。好啦，相信大家都唔會忘記，08年席捲全球的金融海嘯，罪魁禍首係美國次按，美國樓試過「零首期」，結果出現大量貸款壞賬，造成地產泡沫爆破，最終一發不可收拾。
家庭負債佔收入兩倍
講正題，下一個房地產泡沫爆破目標──挪威。係，佢唔係歐元區十七個成員國之一，亦無加入歐盟，因為當年，佢擔心加入咗之後，會對農業帶來衝擊。不過，挪威係歐洲第二大石油和天然氣出口國，同歐盟關係密切，天然資源多，經濟仲唔錯，失業率又低，有400幾萬人口，少過香港。聽落好想去一趟，咁就大件事！唔知大家記憶中仲有無殘留「漁夫都可以變Banker」的冰島，地靈人傑，外表風平浪靜，係人人響往嘅居住地，個時邊有人講瓦努阿圖，就算出左事，你都睇唔到銀行擠提畫面。最後，咪搞到破產收場。
01年起挪威連續六年被聯合國評為最適宜居住的國家。08年以來，挪威樓價升左30%，家庭負債是可支配收入的兩倍。佢哋對上一次樓市爆破係1980年末，當時家庭負債是可支配收入的1.5倍，一爆之下，樓價迅即跌了40%。聽落恐怖，諗諗下，現時爆的機會仲大。當地都聞到燶味，財政部部長Johnsen呢排都向銀行施壓，要求銀行收緊對過度借貸人士做按揭，唔可以借85%或以上，希望遏抑住個勢。
你會話，歐洲係咁o架啦，西班牙、希臘、愛爾蘭全部出事，又如何？政府出手救就一天都光晒。最慘就係，歐洲人冇危機意識，上星期，挪威鑽油工人就因為政府將退休年齡由62歲上調到65歲而罷工，搞到政府每日唔見六億幾港元。連挪威國民都唔同情佢哋，話佢地一年只係開工16個星期，仲要係百萬富翁，少少事都唔忍得。下一站，仲唔輪你爆？
孫柏文
獨立股評人
本欄逢周二、四刊出
