爽報 (財經V36, 2012.8.30)

強迫金係官商勾結，係人都知道。有讀者就提出，如果冇強迫金，政治演員就推全民種金，香港死得更快。所以，佢當強迫金係保護費，咁香港就唔使走向歐式滅亡之路。

17年前，主權移交前嘅立法局，亦有過類似嘅辯論。有一派，反對強迫金，因為佢哋要求全民種金。另一派，就話迫金就迫金，算係做咗嘢，免得嘈落去。經歷五年拉鋸，千禧年底全港打工仔正式被強迫金。尋日《蘋果》財經有好詳盡報道，話畀大家知，強迫金回報，輸盈富基金99條街，真係做定期冇咁嬲！

唔通，香港人唔係俾迫金公司賺盡，就要俾政治演員搞共產？

「全民種金，點算共產呀？」只要唔係馬毛列嗰隻將所有生財資產收歸國有，政治演員都唔當係共產。唔知道日日要政府用公帑買兩電兩隧，又算唔算共產呢？又或者，用錢買都唔算共產，要夾硬嚟國有化先算係列寧精神？

講遠咗。全民種金，將錢「撈亂使」，我就話係一種溫柔共產。溫柔共產，有時比霸王硬上弓更得人驚。有件事，大家一定要知：迫金局主席胡紅玉，當年都支持全民種金；09年上任迫金局主席之後，佢都有提出過，要將大家嘅迫金撈亂洗，溫柔共產，全民種金。香港有福啦，阿彌陀佛。

李兆富