爽報 (財經V36, 2012.9.05)

燈，最光最強，究竟可以去到邊個級數？

星期二，我老友孫柏文喺《蘋果》「金手指」度，話戥有線寬頻（1097）擔心。結果，有線股價同一日升咗三成。公道啲講，肥孫都有話擔心成個傳媒業，所以「電視霸權」（511）股價微跌，當佢中咗一半啦！

其實，肥仔都係想講，傳媒今非昔比，因為言論審查。曾幾何時，傳媒影響力，無論內容抑或廣告，都可以左右消費決定。今時今日，舊媒體一樣有威力，但面對互聯網百家爭鳴，點都要變陣。不過，舊媒體有嚴格規管，互聯網就自由無限；舊媒體好似綁住雙手同人打，好輸蝕。

無論點都好，有線對「電視霸權」，股價一升一跌，好自然令人聯想到開放免費電視牌照。事實上，香港嘅免費電視，自從2008年開始數碼廣播，老早就應該開放。不過，「電視霸權」同弱台，有牌在手又有影響力，開放市場又談何容易？

有一樣嘢，唔講嘅話大家可能唔知。如果按照當年定落嘅進度將廣播轉全數碼，之前好多大氣波段頻譜，可以騰出，做其他電訊服務。事實上，類比電視佔用緊嘅波段頻譜，非常珍貴，拍賣轉做電訊，講緊超多錢。

香港人隱性補貼電視霸權，呢樣嘢好少人知。所以，開放牌照，全盤數碼化啦。最終得益，肯定係消費者。

李兆富