爽報 (財經V37, 2012.9.11)

發展局局長陳茂波話，港人港地，政府絕對唔會賤賣。

地冇折讓，從發展商角度，冇着數，點解要冒險？想啲樓賣平啲？我相信，政府惟有叫房委同房協硬食。回到基本步，所謂港人港地，即係冇入息上限，又唔使補地價嘅居屋、夾屋。

「低下階層，都係想有個安樂窩啫！」好多人都話，要政府「幫」上車，係因為唔想捱貴租。我都明白，人總係覺得自己擁有嘅，好似穩陣啲、有保障啲。而且，一心想上車嘅人，都覺得自己屬於自力更生嗰類。

但係，冇入息上限，又唔使補地價嘅居屋、夾屋，有身份證都去抽啦！博個彩，幾好呀！結果，係咪真係「幫」到有需要嘅人呢？

由始至終，香港打工仔面對最大問題，唔單止係樓價貴，更加大嘅問題係收入不足。其實，一早就有人提出，應該畀香港打工仔用「強迫金」嘅儲蓄買樓。

試諗吓，兩公婆如果打咗十幾年工，加埋儲落閒閒哋五、六十萬「迫金」，如果可以用嚟做首期，好多人都可以平平哋上車。

如果進貢畀基金佬嘅每月供款，可以用來還按揭，好多家庭即刻手頭鬆動。有得揀，先至係老闆嘛。新一屆立法會，希望會有多啲人支持呢個改革啦，至少即時見效，快過港人港地多多聲。

李兆富