爽報 (財經V29, 2012.10.15)

經濟學有個法則，叫Law of One Price，簡單解釋就係：「當市場有效嘅時候，同樣嘅物品，價格會趨向同一水平。」道理好簡單，小學生都會明白。

「市場唔係時時都有效喎？」有人會話。當然，一時三刻之間，市場未必會調節得來，不過，經過一定時間，法則最終都會體現出來。

摧毀回報　扭曲市場

點解講Law of One Price呢？話說，剛剛過去嘅周末，東京舉行嘅世銀年會，伯南克發表偉論，話冇證據顯示聯儲局超寬鬆政策並冇造成新興市場資金湧入嘅現象，仲話只要美國促進經濟復蘇，增加需求，最終都有利新興市場出口。資金流向新興市場，因為佢哋經濟好喎。

其他出席世銀會議嘅新興市場國家財金官員，比起伯南克更接近現實。巴西財長Guido Mantega就話，已發展國家策動嘅貨幣戰爭，係好自私嘅行為，只會令世界更艱難。事實上，巴西已經連減十次息，不過，基準利率仍然有7.25%。巴西貨幣Real兌美元滙率，由今年2月高位，已經貶值近一成。

究竟乜嘢係貨幣戰爭？傳統經濟學教科書，就話貶值刺激出口。不過，今次競爭式貶值，並非為出口。
要知道，美元乃係世界最通行嘅貨幣，金融系統入面最重要嘅資產。用Law of One Price去睇，美元利率，即係借美元嘅成本，降到接近零，其他嘅資產，回報率都會漸漸趨向極低嘅水平。即係話，聯儲局嘅超寬鬆政策，摧毀回報，扭曲市場運作。

被迫減息　惡性循環

好多新興市場，明顯有資產價格泡沫，呢個情況下仍然減息貶值，實在為勢所逼。資金因為要追逐新興國家貨幣嘅利息，照樣湧入，搞到回報低，甚至負回報都照樣投資。好似香港，租金回報其實一直跌，資產價格就不斷乾升，呢種情況，冇可能永遠落去。

有朝一日，雖唔知幾時，到美元利率有回升嘅時候，資金從呢啲國家流出，新興市場國家又可以點應對呢？焗住爆囉！所以，貨幣戰爭嘅惡性循環，係美國將問題輸出到其他國家，冇講錯。

李兆富