爽報 (財經V37, 2012.10.17)

 

噚日，我話要再寫反迫金呢個題目，就連多年來並肩作戰嘅高明都話：「有冇新角度先？」

事實係，迫金局入面班官，已經去到一個地步就係，無論民眾點樣不滿，罵不還口，只管繼續官商勾結，利益輸送。點解？因為佢哋相信，鬧得多，大家就會攰，攰就唔鬧，唔鬧就繼續利益輸送。

亦有讀者話，如果真係廢除迫金，政治演員就會搞「傳聞大鑊飯」。不過，就算迫金繼續，政治演員一樣想將生果金變成「傳聞大鑊飯」。以為可以用強迫金去拖，係過時嘅想法。

另外，迫金局話半自由行會增加競爭，有周刊記者問我意見，我好沒趣咁話：「半自由行，絕對唔會令迫金嘅剝削減少。」

 

冇增加受託人競爭

點解？因為，半自由行並冇增加迫金受託人之間嘅競爭。迫金受託人數目不變，運作模式不變，又點可能有競爭呢？大家有冇諗過，點解百幾萬打工仔，只有十幾間迫金受託人？因為迫金局嘅規管，嚴到無人有。

試諗吓，世界上有咁多搞退休管理嘅基金公司，點解只有呢幾家地頭蟲搵食？如果有人話搞一隻Fund of funds，港股只揸盈富、環球均衡就執隻S&P 500ETF、加埋A50等等，諸如此類，全部被動式管理，收費就算係現有迫金受託人嘅一半，根據迫金局嘅指引，就算佢哋肯批，各項繁文縟節都會搞到冇可能開張。

最諷刺係，用Fund of funds去分散投資，不但回報好過絕大多數現有嘅迫金產品，而且風險更加低。

BlackRock啱啱先公佈，ETF要減管理費：新興市場ETF由0.67%減到0.18%；Total US Stock Market，更加由0.2%減到0.07%。

至於香港的迫金，最貴嗰隻收4%，係BlackRock隻Total US Stock Market嘅57倍收費。但是長線回報唔知有冇整個美國股市嘅57倍咁勁呢？

改革迫金，要真正有選擇，畀打工仔Opt out做定期存款，咁就差唔多。冇得賺，我冇野講，至少唔好要我被人搶吖！

 

李兆富