爽報 (財經V39, 2012.10.19)

 

英文裏面，Cost，可以繙譯做「成本」，亦都可以繙譯做「代價」。

成本，就係要「成」一件事，需要付出嘅「本」。有人話，作為會計概念，「成本」係一個好好嘅譯法。

不過，作為一個經濟學概念，我就覺得「代價」先至譯得精準。「代價」就係要獲得一件事，要放棄嘅其他事物。

有讀過香港高中經濟學嘅朋友，一定會記得：Opportunity cost=the highest-valued option forgone（機會成本=放棄了的最高價值選項）。記得當年為咗應付考試，呢幾隻英文字，發夢都會講起。

點解無端端講起「成本」呢？話說，偉大工人領袖李卓人指控，政府遲遲唔立法限制工時，對無產階級工人，有健康「成本」。

明晒。如立例禁止工作，香港人平均壽命會唔會過100歲呢？如果可以促成人間奇蹟，計我話，犧牲少少經濟生活，其實又有乜所謂？冇錢消費，咪唔好消費囉。大家一齊煉仙，福如東海，壽比南山呀！

 

需洞悉工作價值

師傅教落，高成本，等於想得到嘅嘢，價值更高。健康無價，咁即係工作嘅價值更加高啦，係唔係？

不過，世界上，總會有人睇唔到工作嘅價值，淨係知道返工為咗出糧。我唔係話工作唔需要講求回報，不過，有正面價值觀嘅人，就一定會睇到自己工作嘅價值，然後知道回報又應該係值幾多。睇到工作價值嘅人，唔會成日諗住叫人幫佢立法限制工資；睇到工作價值嘅人，唔會成日話要立法限制工時。

偉大工人領袖李卓人，成世人淨係做過工人領袖，就係冇做過工人，當然唔會鍾意工作啦。

噚日統計公佈，香港失業率由3.2%上升到3.3%，唔知我哋要唔要慶祝偉大工人階級，又一次階段勝利，祝偉大工人領袖長命百歲、千歲、萬歲呢？

講開又講，工時立法，如果根據偉大工人領袖嘅邏輯，就算加時補水都唔準工人超時工作，亦唔準搵秘撈。

健康無價呀！到時，我又睇吓，究竟係工作令人生命有意義，定頹廢令人長壽。

 

李兆富