爽報 (財經V34, 2012.10.24)

同偉大工人領袖李卓人講道理，比起對牛彈琴氣餒不止一百倍。對牛彈琴，大不了隻牛望住你，然後繼續食草。跟偉大工人領袖講道理，你會發現，原來香港嘅政治水平，真係好鬼水皮；政治演員，其實真係唔知個世界發生乜事。

話說，剛剛過去嘅星期日，上有線電視嘅《周日不講理》，偉大工人領袖好似念咒語咁，話只要打工仔供2.5%，老闆供2.5%，政府注資500億，香港就可以有個神奇基金，以後人人去到65歲，都可以有錢派，直到終老。

咁神奇？反對就真係唔啱喎！不過，有咁大隻蛤蚧隨街跳，你又信唔信呢？簡單邏輯，如果全民有供，到65歲都有得分，即係話人人都儲5%，就天下太平啦！好明顯，條數唔係咁計。一個人，就算唔使養上下兩代，自己搵自己使，想65歲退休都要用40年左右嘅工作生涯搵埋60年嘅使用。儲5%真係夠？

敗盡家當　希臘翻版

偉大工人領袖個神奇退休金，佢話十幾年之後，就有一大舊錢可以滾。一直滾，滾到2041年，香港人口老化問題就會見頂。吓！人口老化問題會見頂？真係第一次聽喎！唔通到時，科技發達到啲人會返老還童？

我問偉大工人領袖，究竟佢有冇呢種「傳聞」退休金嘅成功例子。我話佢係希臘模式，佢話唔係，因為希臘嘅退休金人人攞嘅錢都唔同，偉大工人領袖嘅提議，你人人都攞咁多，即係美式啦！美國社保都爆煲喎！偉大工人領袖又話，美國爆嘅理由好多。

究竟美國爆係乜嘢理由呢？點解香港又唔會？美國可印銀紙，香港得咩？偉大工人領袖又話大陸都有社保。不過佢又唔知大陸社保都有鑊氣，投資負回報。講到最後，佢話瑞典幾好吖！

瑞典？偉大工人領袖當然唔知道，90年代經濟危機，加上人口老化，瑞典由94年開始，就不斷要改革「傳聞」嘅退休金。

香港人有偉大工人領袖帶領，真係唔走希臘條路都唔得。敗晒香港嘅錢，北京注資救港府，一國兩制，同時壽終正寢，就好似希臘被德國操控一樣。