爽報 (財經V38, 2012.10.26)

 

平時，我喺《蘋果》「利字當頭」寫嘅題目，「富事通」就會避一避。不過，今日一路寫，讀者就一路留言討論，似乎聯滙呢個題目，寫一篇都唔夠喉，要左右開弓先夠講。講開又講，今日「利字當頭」嘗試用最簡單嘅方法，去解釋聯滙改革嘅三個可能性，大家睇完之後麻煩畀少少意見。

至於呢度，今日我想同大家分析一個概念：「錨」。

貨幣嘅錨，有人認為，係要來防止滙率冇譜地波動。呢種想法，就等於覺得，冇政治管制物價，價格就會亂來。試問，無端端，滙率又點會波動呢？

相反，當政府可控制貨幣供應，就等於有個掣，可以去調控市面上無數咁多商品服務嘅價格。可惜政府永遠都無能力增加貨幣需求。簡單講，宏觀經濟政策收緊時可以好快，但要擴張經濟，卻無能為力。偏偏經濟衰退時，政府有最大壓力要放鬆貨幣基礎。

 

量入為出　絕不舉債

結果，政府控制貨幣，就係一次又一次無謂嘅資產泡沫周期。所以另一套諗法就認為，貨幣最好有個錨，唔好畀政府隨便亂發鈔。錨，一定要有可供交收嘅資產。金本位，係一種錨。聯滙除咗滙率係錨，更加係兌換保證。

只不過，美元呢個錨，無根。但係我仍然同洋人解釋，港元發行制度，世上罕有。每張港紙背後，有百份百嘅等值資產做保證，要有非常嚴謹嘅紀律。原則上，港元背後嘅資產，可以即時轉換成任何其他貨幣，甚至黃金。事實上，港府冇發鈔。98年，美滙急升，對冲基金借港元賭通縮兼貶值，當時金管局有終極武器，就係將香港美元化，炒家即時要蝕息離場。

但當年新政府最終動用財政儲備。事後孔明講，若果當時唔係俄羅斯「賴債」，令炒家火燒後欄，恐怕聯滙早就破功。大家記唔記得，之後特區政府連年赤字？

有錨貨幣，更深層次意義，就係政府必須緊守理財原則，量入為出，絕不舉債。佛利民教落，貨幣本質係一紙憑證。貨幣發行制度真正的基礎，乃係一個有紀律的制度和政府。否則，就算金本位一樣有脫錨嘅政治壓力，呢個係歷史教訓。

 

李兆富