爽報 (財經V26, 2012.10.29)

 

今日，我畀個問題大家思考吓：低買高賣賺錢，算唔算唔道德？

呢度係財經版，所以，我相信100%嘅讀者都會贊成，希望低買高賣賺錢，係人性。成份財經，每日都教人低買高賣。

退一萬步諗，讀者努力去保存辛苦攞來嘅錢，免於貶值，乃係天經地義。老點人去高買低賣，輸錢，先至係唔道德。

可惜，財經版以外，世界上有好多人都覺得，價格越低越好，自己嘅人工同利潤除外。計我話，呢種自我中心嘅主觀願望，先至係同客觀現實格格不入。

我唔鼓勵投機，因為好多人唔明白投機嘅本質，以為做足功課就等於投資。打個比喻，如果有個人，用好畀心機睇馬經，分析賽馬結果，又搜集好多小道消息，然後根據賠率落注，決定有冇值博率，你話佢算唔算投資呢？對唔住，無論做幾多功課，如果結果由隨機因素去決定，定義上，仍然係投機。

 

穩定收入　低買高賣

投機，一買一賣，除咗係產權易手，更加係風險承擔。花咁多篇幅講投機同投資嘅分別，無非想講：「呢個世界，冇話一定賺硬。」

好多人，舉腳支持政府打壓炒樓，因為以為炒樓必賺；更有小部份覺得，既然自己冇本去炒，賺唔到呢筆「不義之財」，就寧願大家一齊冇得賺，一拍兩散。

「唔係憎人富貴！不過，炒樓炒到貴晒，連租都貴埋，政府點都要做啲嘢囉！」不過，絕大多數人其實係咁諗。

我哋要問吓，究竟係因為啲人認為價錢會升，所以先至入場？定係真係可以因為好多人入場，令到價錢上升？如果你認為係後者，即係話你都相信資產市場已經進入接火棒嘅泡沫狀態，點解仍然要衝入火坑呢？

雖然我唔知道泡沫可以維持幾耐，但係基於低買高賣嘅原則，我會建議你覺得啲樓抵買時先出手啦！投資理財，永遠最緊要都係，保住穩定收入。當人人都恐懼嘅時候，有穩定收入，先至可以安心咁承擔別人抵受唔住嘅風險。

期望政府打壓炒樓幫你上車？嘥氣啦！

 

李兆富