爽報 (財經V34, 2012.10.30)

以前，思歪未做特首，仍然係行政會議召集人，試過夾埋電視霸權511，搞《700萬人的故事》，協工聯會以令煲呔，成功爭取工資立法。

早兩日，現任行政會議召集人林煥光，去思歪母校紅磡工專公開發言，話自己由1994年開始就爭取全民種金，不過英國人同資本家一直打壓，故不得要領。

紅色革命家當家作主，敢叫日月換新天。人家歐美搞福利，香港點可輸蝕！人家歐美債務，三代人還唔清，我哋中國人，子又有子，孫又有孫，使乜驚？人家可印鈔票，唔通金管局同人行就唔識印？

先有偉大工人領袖打頭陣，然後思歪護法吶喊助威。我真係分唔清，香港政壇，邊個係人，邊個係鬼。至於嗰班二世祖獻世派個個粒聲唔出，乜唔係話功能組別要來均衡參與咩？

福利非救濟

咪玩啦！香港政治現實好簡單；只要特首落柯打，官僚機器就自動開工。第一步，外圍嘅人吹風做勢，試吓水溫。之後就扮話研究，睇清楚形勢，然後西瓜靠大邊。自稱代表商界嘅二世祖獻世派，通常起初都會講兩句。但香港地同政府對着幹，冇好處。二世祖獻世派收夠籌，一般都就唔再出聲；工資立法如是，競爭法亦如是。順手拈來，我至少可以攞一打半打二世祖獻世派出賣香港經濟嘅案例出嚟畀大家睇。

如以為政治演員會為我哋捍衞權益，真係俾人食咗隻車都唔知發生乜事。偉大工人領袖要求全民種金，因為佢哋覺得可以贏選票。思歪政府諗全民種金，有三個理由：一，佢哋覺得派錢可博民意；二，佢哋想香港人更依賴政府；三，敗清盈餘，就可順理成章要北京出手「救」特區。以前，香港係創造機會嘅地方；今日，變成搵着數嘅樂園。福利福利，講得好聽，其實，英文有個概念，叫Entitlement，大概可以譯做：「奉旨有得分」。即係話，福利唔係救濟幫人，而係權利。

「只要你係香港人，就有人欠咗你。」冇錯，官紳名流、工人領袖、社會未來棟樑，個個都宣揚呢個訊息。唉，天祐香港，阿門。

李兆富