爽報 (財經V35, 2012.10.31)

前日，我哋獅子山學會派出今屆學師羅繼堯，上立法會福利事務委員會，踢爆「連李嘉誠都有得分」嘅所謂福利安全網有幾荒謬。

當然，政治演員肯定話：「連李嘉誠都有得分又有乜問題，香港又有幾多個李嘉誠啫？」

所以，羅同學少不免要用活生生嘅例子，去證明福利好易俾人濫用。

就地取材，羅同學當然要提下，月入八萬嘅梁國雄議員（長毛），點樣睇居住月入幾千嘅基層住劏房，而尊貴嘅議員就繼續大條道理做公屋富戶。

先唔好同我講話長毛捐晒份薪津，答我一個問題：「福利，係唔係應該先分畀最有需要嘅人？」

長毛係唔係最有需要嘅人？佢唔係諗住改變世界咩？一個有能力改變世界嘅人，竟然連社會謀生能力都冇？點改變世界呀？

正如羅同學上立法會講，資源有限，小學生明白，自由黨同人民力量都可能會明白。我要加多一句，價值係要創造出來；政治演員要全港一齊坐食山崩，結果會點，呢個欄嘅讀者心裏有數。

講個咁簡單嘅道理，竟然都會激親尊貴嘅長毛議員，打斷羅同學發言不特止，仲要話孫柏文係「母親至愛」（裙腳仔）。嘿，肥仔同伯母，母慈子孝，咁都唔抵得？

點知第二日睇報紙，先知道原來長毛簽過「衰仔紙」，幫阿媽攞綜援。長毛又大大聲鬧其他政治演員唔支持全民退保，搞到佢母親大人臨老要搬去增城。子欲養而親不待，嗰份悲痛，我明白。不過，長毛你要求人家老吾老以及人之老，唔該你都問下自己，有冇做好本份。簽「衰仔紙」，算唔算盡孝義呢？

另外，件事仲有個小插曲。話說，羅同學發言嘅時候，好刻意咁話，連李嘉誠都有得分嘅所謂福利，係劫貧濟富。

畢竟，今日班後生仔，慘到住劏房，政治演員要佢哋去供養班享盡香港經濟奇蹟嘅戰後第二代，仲唔係劫貧濟富？

點知，硬係蘋果要寫「劫富濟貧」。王弼話蘋果記者潛意識相信政治係劫富濟貧。我就覺得係手民之誤。沙膽老總，你又點睇啊？

李兆富